20/11/2020 - «Լույսն ունենք, ջուրն ունենք, գազամատակարարումն էլ ամբողջությամբ կվերականգնվի առաջիկա օրերին, ներկայումս ինտենսիվ աշխատում ենք այդ ուղղությամբ»,- ՀԺ-ի հետ զրույցում հայտնեց Մարտակերտի քաղաքապետ Միշա Գյուրջյանը՝ ներկայացնելով քաղաքում տիրող իրավիճակը. «Բենզալցակայանն աշխատում է, մի քանի խանութներ արդեն բացվել են»:

Սրան զուգահեռ Մարտակերտում շարունակվում են վթարավերականգնողական աշխատանքներն ու վնասված շենք-շինությունների գույքագրման պրոցեսը:

Վնասների մասին վերջնական խոսելը, ըստ քաղաքապետի, դեռ վաղ է։ «100-150 շենք շինություն ամբողջությամբ հողին է հավասարեցվել, մյուս բնակարանների ու շենք շինությունների տանիքներն ու ապակիները ամբողջությամբ ջարդված են, եկած մարդիկ հիմա պոլիէթիլենային թաղանթով փորձում են ժամանակավոր ծածկել, մինչեւ տեսնենք ինչ է լինում»,- հավելեց Միշա Գյուրջյանը։