Ինչպես հաղորդում է արաբական «Ալ Հադաս» հեռուստաալիքը, Սիրիայի զինված ուժերի մարտիկները ձերբակալել են թուրքամետ գրոհայիններին, որոնք հարցաքննության ժամանակ պատմել են Արցախում ահաբեկչական ավազակախմբերի մասնակցության և կորուստների մասին։
Ձերբակալված Ամին Իմադ Էս-Սաիդը պարզաբանել է, որ "Սուլթան Մուրադ" խմբավորման անդամ է, մինչ այդ եղել է Ահաբեկչական Սիրիական Ազատ Բանակում, մարզվել է Աֆրինում թուրք հրահանգիչների ղեկավարությամբ, ամսական 350 Թուրքական լիրա (մոտ 50 դոլար) աշխատավարձ է ստացել, ինչպես նաև պատմել է իր հրամանատար Աբդել Ռահիմ Ռահման Թուրքմենիի մասին:
Արցախյան երկրորդ պատերազմում "Սուլթան Մուրադի" գրոհայինների մասնակցության մասին հարցին ի պատասխան նա հայտնել է, որ գրոհայիններին հավաքագրում են տարբեր խմբավորումներում։ Նրանց հազարներով Թուրքիայի տարածքով տեղափոխում են Ադրբեջան։ Այսպես կոչվող «գործուղուման» տևողությունը 3 ամիս է, վճարում են 2000 դոլար։ Էս Սայիդը պատմել է նաև հայկական զորքերի հետ մարտերում ավազակախմբերի մեծ կորուստների մասին։