Դուշանբեում մեկնարկել է Հայաստանի, Ռուսաստանի և Ադրբեջանի արտգործնախարարներ Արարատ Միրզոյանի, Սերգեյ Լավրովի և Ջեյհուն Բայրամովի եռակողմ հանդիպումը:
Ավելի վաղ Սերգեյ Լավրովն առանձին երկկողմ հանդիպումներ է անցկացրել Հայաստանի և Ադրբեջանի ԱԳ նախարարների հետ:
Ռուսաստանի և Ադրբեջանի արտգործնախարարներ Սերգեյ Լավրովն ու Ջեյհուն Բայրամովը երկկողմ հանդիպում են անցկացրել Դուշանբեում ԱՊՀ ԱԳ նախարարների խորհրդի շրջանակներում:
Լավրովն անդրադարձել է ռուս-ադրբեջանական հարաբերություններին՝ նշելով, որ դրանք տեղափոխվել են որակապես նոր՝ դաշնակցային փոխգործակցության մակարդակ:
ՌԴ գլխավոր դիվանագետն անդրադարձել է երկկողմ հարաբերությունների հաստատման 30-ամյակին նվիրված միջոցառումներին, տնտեսական համագործակցությանը:
«Այսօր մենք լավ հնարավորություն ունենք եռակողմ հանդիպում անցկացնել մեր հայ գործընկերոջ հետ, տեսնել, թե ինչպես են կատարվում երեք եռակողմ հայտարարությունները, որոնք մեր երկրների ղեկավարներն ընդունել են վերջին 1,5 տարում»,- ասել է Լավրովը:
Ադրբեջանի ԱԳ նախարարի հետ հանդիպումից հետո մեկնարկել է Լավրովի հանդիպումը ՀՀ ԱԳ նախարար Արարատ Միրզոյանի հետ:
Հայաստանն ակնկալում է, որ Ռուսաստանի նախագահ Վլադիմիր Պուտինը պետական այցով Հայաստան կայցելի ընթացիկ տարվա հոկտեմբեր-դեկտեմբեր ժամանակահատվածում. այժմ ընթանում է մանրամասների և ժամկետների հստակեցումը: Այս մասին Դուշանբեում Ռուսաստանի արտգործնախարար Սերգեյ Լավրովի հետ հանդիպմանը հայտնել է Հայաստանի արտգործնախարար Արարատ Միրզոյանը:
Նա նաև նշել է, որ Հայաստանի և Ադրբեջանի միջև սահմանների սահմանազատման և սահմանային անվտանգության հանձնաժողովների հանդիպումը նախատեսված է հաջորդ շաբաթ Մոսկվայում:
«Ուզում եմ տեղեկացնել, որ մենք ադրբեջանցի գործընկերների հետ շփվել ենք սահմանազատման և սահմանային անվտանգության հանձնաժողովների ստեղծման հարցով։ Եվ, կարծես, ՌԴ փոխվարչապետ Ալեքսեյ Օվերչուկի հետ պայմանավորվածություն կա, որ մայիսի 16-17-ը հաղորդակցությունների հարցերով հանդիպում է նախատեսվում Մոսկվայում: Նաև պայմանավորվածություն կա, որ նույն օրը Մոսկվայում կազմակերպվի սահմանազատման և սահմանային անվտանգության երկկողմ հանդիպում»,- ասել է Միրզոյանը։
Լավրովն իր հերթին անդրադարձել է հայ-ռուսական երկկողմ հարաբերություններին՝ նշելով. «Մեր շփումների ինտենսիվությունը հաստատում է ռուս-հայկական հարաբերությունների մակարդակը, ինչը հատկապես կարևոր է դիվանագիտական հարաբերությունների հաստատման 30-ամյակին։ Անշուշտ, նշանակալի իրադարձություն էր Հայաստանի վարչապետ Նիկոլ Փաշինյանի առաջին պաշտոնական այցը Ռուսաստանի Դաշնություն, որի ընթացքում հագեցած բանակցություններ են տեղի ունեցել Ռուսաստանի ղեկավարության հետ»:
