Նախօրեին տեղեկացվել էր, որ ՀՀ քրեական օրենսգրքի 297-րդ հոդվածի 2-րդ մասի 1-ին կետի հատկանիշներով նախաձեռնված քրեական վարույթի շրջանակներում ԵՊՀ-ում առերևույթ խուլիգանություն կատարելու կասկածանքով ձերբակալվել են Երևան քաղաքի 38-ամյա բնակիչ Ց․Ա․-ն և 32-ամյա բնակիչ Դ․Ս․-ն։

 

ՀՀ քննչական կոմիտեի նախագահի մամուլի քարտուղար Գոռ Աբրահամյանը տեղեկացնում է՝ վարույթն իրականացնող մարմնի որոշմամբ նրանք ազատ են արձակվում ձերբակալումից՝ դրա անհրաժեշտությունը վերանալու հիմքով։

 

Քրեական վարույթով նախաքննությունը շարունակվում է։

 

Գոռ Աբրահամյանը նշել է նաև, որ այս պահի դրությամբ նրանց նկատմամբ քրեական հետապնդում հարուցված չէ։

 

Նշենք, որ ավելի վաղ, ԱԺ «Պատիվ ունեմ» խմբակցության քարտուղար Տիգրան Աբրահամյանը ձերբակալվածների պահման վայրում այսօր հանդիպել է լրագրող Դավիթ Սարգսյանին և դասախոս Ցոլակ Ակոպյանին:

 

«Երկուսն էլ դասավանդում են բուհում, գիտությունների թեկնածու են, դոցենտ, բայց, ինչպես հայտնի է` իշխանությունը հատկապես թշնամաբար է տրամադրված նման դեմքերի նկատմամբ: Հերթական «կարված» գործերն են, ապօրինի ձերբակալությունները: Երկուսն էլ խնդրեցին փոխանցել, որ իրենց բանտով կամ ճնշումներով ահաբեկել չի ստացվելու և ակտիվորեն շարունակելու են իրենց պայքարը»,- Facebook-ում գրել է պատգամավորը։