Բաքվում Ադրբեջանի նախագահ Իլհամ Ալիևը Լեհաստանի արտաքին գործերի նախարար, ԵԱՀԿ գործող նախագահ Զբիգնև Ռաուինի հետ կայացած հանդիպման ընթացքում խոսել է Հայաստանի հետ խաղաղության պայմանագիր կնքելու հարցի վերաբերյալ։ Այս մասին հայտնում են ադրբեջանական ԶԼՄ-ները:
Իլհամ Ալիևը նշել է՝ պետք է շարժվել դեպի խաղաղությունը Ադրբեջանի և Հայաստանի միջև, ինչպես նաև որքան հնարավոր է շուտ կնքել խաղաղության պայմանագիր։
«ԵՄ-ն արդեն հայտարարել է, որ Եվրոպական խորհրդի նախագահ Շառլ Միշելի աջակցությամբ կկայանա Ադրբեջանի նախագահի և Հայաստանի վարչապետի նոր հանդիպումը։ Հուսով եմ, որ այս հանդիպումը արդյունավետ կլինի։ Որովհետև արդեն մի քանի հանդիպումներ են տեղի ունեցել, և մենք պետք է շարժվենք դեպի խաղաղություն Ադրբեջանի և Հայաստանի միջև, ինչպես նաև որքան հնարավոր է շուտ կնքենք խաղաղության պայմանագիր։ Ադրբեջանը ներկայացրել է այս համաձայնագրի հիմնարար սկզբունքները»,- ասել է Ադրբեջանի նախագահը:
Չնայած միջազգային հանրությունից ստացվող հակառակ ուղերձներին՝ Ալիևը հերթական անգամ հայտարարել է, որ ԼՂ հակամարտությունը լուծված է, և որ այժմ ժամանակն է կարգավորել Ադրբեջանի և Հայաստանի հարաբերությունները։
«Մենք որոշակի ազդակներ ենք ստանում հայ պաշտոնյաներից։ Ինչպես վերջերս տեղեկացա, այդ ուղերձներից մեկն այն է, որ նրանք ընդունելի են համարում մեր առաջարկը։ Սա շատ լավ նորություն է, և ես հուսով եմ, որ այս հարցը կհստակեցվի Բրյուսելում կայանալիք հանդիպմանը»,- հավելել է նա: