Օգոստոսի 23-ին հայկական «Զույգ Արեգակներ» բալետը կհեռարձակվի ավելի քան 80 երկրներում հեռարձակվող աշխարհահռչակ Mezzo TV հեռուստաալիքի 60 միլիոն հետևորդ ունեցող միջազգային հարթակում:
Ռուդոլֆ Խառատյանի բալետի առաջին առցանց հեռարձակումը «MEZZO TV»-ի եթերում կիրականացվի օգոստոսի 23-ին` Երևանի ժամանակով ժամը 22։15-ին։ Հեռարձակումը կիրականացվի նաև օգոստոսի 29–ին, սեպտեմբերի 9-ին և 15-ին, համապատասխանաբար 9:10-ին, 10:15-ին և 14:20-ին։
«Զույգ Արեգակներ» բալետը հիմնված է Գրիգոր Նարեկացու «Մատյան ողբերգության» պոեմի վրա: Սցենարի հեղինակ և բեմադրող խորեոգրաֆն է Ռուդոլֆ Խառատյանը, երաժշտությունը ներկայացնում է 4-21-րդ դարերի՝ Մեսրոպ Մաշտոցի, Գրիգոր Նարեկացու, Արամ Խաչատրյանի, Ալան Հովհաննեսի, Առնո Բաբաջանյանի, Ավետ Տերտերյանի և Աշոտ Արիյանի ստեղծագործությունները: Բեմի ձևավորման և զգեստների հեղինակն է Աստղիկ Ստեփանյանը:
«Զույգ Արեգակներ» միջազգային բալետային նախագիծն իրականացվել է 2015 թվականին «Բալետ2021» հիմնադրամի կողմից Հայոց ցեղասպանության 100-րդ տարելիցի պետական միջոցառումների կոմիտեյի և «Հրայր և Աննա Հովնանյաններ» հիմնադրամի աջակցությամբ: Բալետի առաջնախաղը տեղի է ունեցել 2015թ. մայիսի 27-ին Օպերայի և բալետի ազգային ակադեմիական թատրոնում: