Իրանի պաշտպանության նախարար Մոհամմադ Ռեզա Աշտիանին Թեհրանում իր հայ գործընկերոջ՝ Սուրեն Պապիկյանի հետ հանդիպման ժամանակ ասել է, որ տարածաշրջանից դուրս անվտանգության որոնումը հակառակ արդյունքի կբերի։
Գեներալի խոսքով՝ անվտանգության ճարտարապետությունը պետք է ձևավորվի հենց տարածաշրջանում, հակառակ դեպքում այն կվերածվի գերտերությունների միջև բախման ասպարեզի՝ դրանից բխող բոլոր հետևանքներով և սպառնալիքներով։
«Մենք չպետք է թույլ տանք, որ տարածաշրջանը վերածվի օտարերկրացիների համար մրցակցության դաշտի, որը կազդի տարածաշրջանի բոլոր երկրների անվտանգության և կայունության վրա»,- հավելել է նախարարը, իրանական լրատվամիջոցների փոխանցմամբ:
Նա նաև ընդգծել է, որ բոլոր հարևանների հետ հարաբերությունների ամրապնդումը Իսլամական Հանրապետության արտաքին քաղաքականության մի մասն է, սակայն Հայաստանը առանձնահատուկ նշանակություն ունի, և Հայաստանի անկախացումից ի վեր երկու երկրների հարաբերությունները հետևողականորեն զարգանում են տարբեր ոլորտներում։ Նախարարը հայտնել է Իրանի վճռական դիրքորոշումը տարածաշրջանի երկրների տարածքային ամբողջականությանն ու ինքնիշխանությանը աջակցելու հարցում։
