Այսօր Ստամբուլում դատարանի շենքի մոտ ահաբեկչության փորձի հետևանքով վեց մարդ է վիրավորվել, այդ թվում` երեք ոստիկան։ Հարձակվողները՝ մեկ կին և մեկ տղամարդ, սպանվել են։ Ենթադրվում է, որ նրանք DHKP/C ահաբեկչական զինյալ խմբի հետ կապ ունեն, ասել է Թուրքիայի ներքին գործերի նախարար Ալի Երլիքայան։
Հարձակվողներն առավոտյան կրակ էին բացել դատարանի շենքի մոտ գտնվող ոստիկանական անցակետի վրա։
Ականատես Բանու Փոլարը Reuters-ին պատմել է, որ սկզբում հարձակում է կատարվել ներսում, մեկ ոստիկան է վիրավորվել, որին տարել են դատարանի շեքում գտնվող բուժկետ։ Հետո հարձակում է կատարվել դրսից։ «Կարծում եմ ահաբեկչություն էր։ Մեծ խուճապ էր, բոլորը պառկել էին գետնին», - ասել է նա։
Միջադեպի վայրից տեսանյութերը ցույց են տալիս ոստիկանական ուժերի ակտիվություն, դատարանի շենքի մուտքն ու ելքը փակված է։
Արդարադատության նախարարը հայտնել է, որ դատախազությունը հետաքննություն է սկսել։