Նախագահ Արմեն Սարգսյանի հրամանագրով՝ Համբարձում Մաթևոսյանը նշանակվել է ՀՀ փոխվարչապետ:
«Հիմք ընդունելով վարչապետի առաջարկությունը` համաձայն Սահմանադրության 131-րդ հոդվածի, ինչպես նաև «Կառավարության կառուցվածքի և գործունեության մասին» օրենքի 5-րդ հոդվածի 1-ին մասի Համբարձում Մաթևոսյանին նշանակել փոխվարչապետ»,- ասված է հրամանագրում:
Ավելի վաղ հայտնել էինք, որ կառավարության որոշմամբ՝ Համբարձում Մաթևոսյանն ազատվել է ՀՀ Արմավիրի մարզպետի պաշտոնից:
ՀՀ Կառավարության նիստի մեկնարկին ՀՀ վարչապետ Նիկոլ Փաշինյանը ներկայացրեց նորանշանակ փոխվարչապետ Համբարձում Մաթևոսյանին:
«Ուզում եմ շնորհավորել պարոն Մաթևոսյանին փոխվարչապետի պաշտոնում նշանակվելու առիթով և հաջողություններ մաղթել՝ ի նպաստ Հայաստանի և հայ ժողովրդի գործունեություն ծավալելու իմաստով»,- ասաց ՀՀ վարչապետը:
Մաթևոսյանն էլ շնորհակալություն հայտնեց վստահության համար:
«Փորձելու եմ անել հնարավորը, որպեսզի արդարացնեմ ձեր և մեր հայրենակիցների ակնկալիքները»,- ասաց նորանշանակ փոխվարչապետը:
