Արդեն մի քանի օր է՝ բուռն զարգացումներ ենք տեսնում հոգևոր դասում: Այս մասին այսօր Ազգային ժողովում իր ելույթում ասաց «Քաղաքացիական պայմանագիր» խմբակցության պատգամավոր Վահագն Ալեքսանյանը:
«Օրերս Մայր Աթոռը կեղծ լուր էր տարածել, թե իբր ՀՀ իշխանությունները պատրաստվում են տարածքներ հանձնել Տավուշի մարզից, ինչը կեղծ լուր էր և այդ խոսույթով Մայր Աթոռը խախտել էր Աստծո պատվիրաններից առնվազն մեկը՝ «Մի՛ ստիր»-ը, և ստել էր»,- ասաց նա:
Ընդդիմադիր գործընկերներից մեկի այն գնահատականներին, թե Հայաստանին տանում են Ուկրաինայի սցենարով՝ նա ասաց. «Ամեն անգամ ուզում եմ հարցնել՝ կարո՞ղ է ինքը ինչ-որ ինֆորմացիա ունի Հայաստան-Ռուսաստան մոտալուտ ինչ-որ ռազմական կոնֆլիկտի մասին», և հարց բարձրացրեց, թե միթե դա աբսուրդ չէ:
«Հայտարարեք այն մասին, թե որն է Հայաստանի ձեր պատկերացրած տարածքային ամբողջականությունը: ՀՀ ընդդիմությունն իր առաջ ունի երեք նպատակ. առաջինը՝ ՀՀ-ում հասնել հակասահմանադրական իշխանափոխության, երկրորդ՝ տալ միջանցք Ադրբեջանի Հանրապետությանը և երրորդ՝ Հայաստանը մտցնել միութենական պետության մեջ»,- ասաց նա:
