ՀՀ կրթության, գիտության, մշակույթի և սպորտի նախարար Վահրամ Դումանյանն ընդունել է Վ. Բրյուսովի անվան պետական համալսարանի ուսանողության ներկայացուցիչներին, որոնք նախարարին են փոխանցել իրենց դիմումը` բուհերի խոշորացման նախագծի վերաբերյալ: Հանդիպմանը ներկա են եղել ԿԳՄՍ նախարարի տեղակալներ Կարեն Թռչունյանը և Ժաննա Անդրեասյանը:
Ուսանողների հետ հանդիպմանը նախարարը ներկայացրեց բուհերի միավորման ծրագրի վերաբերյալ իրենց գերատեսչության մոտեցումը: Մասնավորապես՝ նախարար Դումանյանը ուսանողներին տեղեկացրեց, որ գործընթացը գաղտնի չի անցկացվում, ամեն հարց հրապարակային ներկայացվում է։ Նա հավելեց, որ դեռ օգոստոսին կայացել է ռեկտորների հանդիպում։ Ռեկտորները իրազեկված են եղել բուհերի միավորման գործընթացի վերաբերյալ։
«Կարծում եմ, դուք տեղյակ չեք որոշ հանգամանքներից, դրանք պատշաճ չեն մատուցվել ձեզ։ Նախագիծը հոկտեմբերի 7-ին, սահմանված կարգով ներկայացվել է արդարադատության նախադրություն համապատասխան եզրակացության համար»,- նշեց Դումանյանը։
Նախարարն ակնկալում է, որ իրենք պատշաճ կիրազեկվեն նաև բուհում տեղի ունեցող գործընթացների վերաբերյալ։ Դումանյանը հիշեցրեց, որ որպես լիազոր մարմին՝ տեղեկացված չեն եղել բուհի հոգաբարձուների խորհրդի օրակարգից։
«Դեռ օգոստոսի 9-ին ձեր և նշված բուհերի ռեկտորների հետ իմ աշխատասենյակում կայացել է հանդիպում, որտեղ հստակ ասվել է, որ կա բուհերի միավորման գաղափարը։ Մենք միշտ և հիմա էլ պատրաստ ենք առողջ քննարկման»,- նշեց Դումանյանը՝ դիմելով ուսանողներին։
Նախարարը շեշտեց, որ նորից պատրաստ են հանդիպել և քննարկում ունենալ խնդիրների վերաբերյալ, եթե կան այդպիսիք։ Նախագծի նախնական տարբերակը, որն աշխատանքային փաստաթուղթ է, կարող է վերամշակվել, փոփոխվել՝ հաշվի առնելով խնդիրներն ու մտահոգությունները։
«Մենք պատրաստ ենք եղել, հիմա էլ պատրաստ ենք առողջ քննարկման. այս գործընթացը լինելու է փուլային, կառուցողական: Կան բազմաթիվ հարցեր, որոնք պետք է մանրակրկիտ ուսումնասիրել: Նախագիծը պատրաստ ենք քննարկել ինչպես ուսանողների, այնպես էլ պրոֆեսորադասախոսական անձնակազմի և գործընկեր մյուս բուհերի հետ»,- նշել է ԿԳՄՍ նախարար Վահրամ Դումանյանը` շեշտելով, որ նախագիծը երաշխավորում է ուսանողների կրթության իրավունքի լիարժեք ապահովումը և հետապնդում է կրթության որակի բարելավման հստակ նպատակ:
Վահրամ Դումանյանը նշել է, որ պատրաստ է հանդիպումներ ունենալ Բրյուսովի անվան պետական համալսարանի, ինչպես նաև խոշորացման ծրագրում ընդգրկված մյուս բուհերի` Խ. Աբովյանի անվան պետական մանկավարժական համալսարանի և Հայաստանի ֆիզիկական կուլտուրայի և սպորտի պետական ինստիտուտի ուսանողների ու պրոֆեսորադասախոսական կազմի ներկայացուցիչների հետ` գիտակրթական խնդիրները քննարկելու օրակարգով: Նախարարը փաստել է, որ գաղտնի որևէ գործընթաց տեղի չի ունեցել և չի կարող ունենալ. բուհերի միավորման վերաբերյալ կայացված որոշում այս պահին չկա և առաջիկա մեկ ամսվա ընթացքում չի կարող լինել, քանի որ սահմանված ընթացակարգը նաև որոշակի ժամկետներ է պահանջում:
Ըստ նախարարի` աշխատանքային նախագիծն այս պահին պետական կառույցների համաձայնեցման և իրավական ձևակերպումների հստակեցման փուլում է գտնվում: Մշակվող նախագծի հիմքում բուհական համակարգի արդյունավետությունից բխող գիտաչափական տվյալներ են դրված, որոնք լրամշակման և խմբագրման կենթարկվեն ակադեմիական քննարկումների և հիմնավոր մասնագիտական առաջարկությունների արդյունքում:
«Մենք պետք է հասկանանք և որպես ելակետ ընդունենք այն սկզբունքը, որ բուհական ցանկացած մասնագիտություն պետք է ունենա գիտական և հետազոտական բաղադրիչ, հակառակ պարագայում պետք է մտածենք և դիտարկենք, թե տվյալ մասնագիտությամբ բուհական կրթության իրականացումը որքանով է նպատակային: Բուհական և ակադեմիական միջավայրում նմանաբնույթ խնդիրների քննարկումն օրինաչափ է, և այս մասին քննարկումների ծավալումը հանրային շահարկման վերածելն անթույլատրելի է»,- նշել է Վահրամ Դումանյանը:
ԿԳՄՍ նախարարը նաև փաստել է, որ աշխատանքային նախագծի մասին դեռևս այս տարվա օգոստոսի 9-ին տեղեկացվել են վերոնշյալ բուհերի ռեկտորները, որոնց առաջարկվել է ներկայացնել առաջարկություններ` բուհերի խոշորացման ծրագրի մշակումն առավել արդյունավետ իրականացնելու նպատակով: Բուհերի կողմից որևէ առաջարկ չի ներկայացվել: ԿԳՄՍ նախարարությունն այսօր էլ պատրաստ է քննարկել մասնագիտական և ակադեմիական հիմքեր ունեցող բոլոր շահեկան առաջարկությունները:
Ուսանողները տեղեկացրին, որ նախարարին ևս մեկ անգամ հրավիրում են գիտական խորհրդի նիստին՝ ակնկալելով նրա մասնակցությունը։
