ՀՀ կառավարության 2022 թ. փետրվարի 28-ի «ՀՀ կառավարության ծրագրի (2021-2026 թթ.) 2021 թվականի կատարման ընթացքի և արդյունքների զեկույցի մասին» N 234-Ա որոշմամբ հավանության արժանացած զեկույցը քննարկվել է ԱԺ մարդու իրավունքների պաշտպանության և հանրային հարցերի մշտական հանձնաժողովի նիստում:
ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանը ներկայացրել է նախարարության համակարգման ոլորտը՝ նշելով, որ հաշվետու տարում կառավարության ուշադրության կենտրոնում է եղել մարդկային կապիտալի շարունակական զարգացումն ու սոցիալական ապահովությունը:
2022 թ. հունվարի 1-ից ավելացել են 131.767 շահառուներին վճարվող գումարները: Նվազագույն կենսաթոշակի չափը կազմում է 28.600 դրամ (2021թ. գործող 26.500 դրամի փոխարեն): Առաջին խմբի հաշմանդամություն ունեցող անձանց համար կենսաթոշակը 43.000 դրամ է դարձել՝ նախկին 40.000-ի փոխարեն, երկրորդ խմբի հաշմանդամություն ունեցող անձանց համար՝ 33.000 դրամ՝ նախկին 30.000-ի դիմաց, երրորդ խմբի հաշմանդամություն ունեցողների համար՝ 30.000 դրամ` նախկին 27.000-ի փոխարեն:
Փոխնախարարը բարեփոխումների շարքում առանձնացրել է կենսաթոշակների ու նպաստների վճարումը հնարավորինս անկանխիկ եղանակով իրականացնելու կարևորությունը: 2021 թ. հուլիսից Գյումրին, Երևանը և Վանաձորն անցել են այդ համակարգին, գործընթացը բարելավման փուլում է:
Տաթևիկ Ստեփանյանը ներկայացրել է նաև ժողովրդագրական վիճակի բարելավման միջոցառումների ծրագրով իրականացվող քայլերը, խոսել երեխայի խնամքի և պաշտպանության ոլորտում համակարգային բարեփոխումների անհրաժեշտության մասին: 2021թ. երեխայի խնամք և պաշտպանություն իրականացնող շուրջօրյա խնամքի հաստատություններից ընտանիք է վերադարձել 10 երեխա, ժամանակավոր խնամք իրականացնող կենտրոններից կենսաբանական ընտանիքների հետ վերամիավորվել է 48 երեխա:
Գենդերային քաղաքականության ոլորտում 2021 թ. ապահովվել է պետական բյուջեի համաֆինանսավորմամբ բոլոր մարզերում և Երևանում գործող ընտանեկան բռնության ենթարկված անձանց աջակցության կենտրոնների և ապաստարանների գործունեության շարունակականությունը:
Կառավարության կողմից 2020 թ. նոյեմբերից սկսած և 2021 թ. ամբողջ ընթացքում իրականացվել են 2 տասնյակից ավելի միջոցառումներ՝ 136 մլրդ դրամ ընդհանուր բյուջեով, որից 120 մլրդ դրամը հատկացվել է 2021 թ. ընթացքում: Փոխնախարարի խոսքով` Արցախի սոցիալ-տնտեսական վերականգնմանն ուղղված միջոցառումները շարունակական են:
Ներկայացվել են նաև տվյալներ հաշմանդամություն ստացած զինծառայողների սոցիալական երաշխիքների, պրոթեզավորման գործընթացի և մասնագիտական վերապատրաստման ապահովման վերաբերյալ:
Տաթևիկ Ստեփանյանն ու ՀՀ աշխատանքի և սոցիալական հարցերի նախարարի մյուս տեղակալ Աննա Ժամակոչյանը պատասխանել են պատգամավորների հարցերին, որոնք վերաբերել են սոցիալական փաթեթի շահառուների ընդլայնմանը, միասնական սոցիալական ծառայության աշխատակիցների վերապատրաստմանը, Արցախից տեղահանված քաղաքացիների խնդիրներին և այլն:
