Յուրաքանչյուր ազգի մշակույթ նրա հոգեւոր զարգացման առանցքն է: Ազգային ժողովը` որպես պետության կարեւորագույն ինստիտուտ, իր գործառույթներից բացի ունի առաքելություն` նպաստելու հասարակական կյանքի զարգացմանը, մշակութային միջավայրի ձեւավորմանը, հանրայնացնելու ժամանակակից արվեստը եւ նպաստելու արվեստի ու մշակութային արժեքների հանդեպ հետաքրքրության բարձրացմանը: Այս մասին ասել է ԱԺ աշխատակազմի ղեկավար-գլխավոր քարտուղար Վահան Նարիբեկյանը մայիսի 26-ին Ազգային ժողովում կայացած Հայաստանի նկարիչների միության պատվավոր անդամ Մարինե Մանուկյանի` «Դեպի արեւ» խորագրով անհատական ցուցահանդեսի բացմանը:
Վահան Նարիբեկյանի գնահատմամբ` հեղինակի ստեղծագործություններում գերիշխում են հայկական տաք գույները, արեւի ջերմությունը: Նշվել է, որ հեղինակը յուրովի է տեսնում իրեն շրջապատող աշխարհի գեղեցկությունը եւ ստեղծում արվեստի նման հրաշալի գործեր:
Մարինե Մանուկյանը շնորհակալություն է հայտնել հնարավորության համար` նշելով, որ պատիվ է օրենսդիր մարմնում ներկայացնել իր աշխատանքները: Մասնագիտությամբ իրավաբան Մարինե Մանուկյանի խոսքով` կտավներում արտացոլված են իր հույզերը եւ զգացմունքները:
Միջոցառմանը ներկա պատգամավորները եւ արվեստագետները, կտավներից ոգեշնչված, կիսվել են իրենց տպավորություններով, հնչեցրել գնահատանքի խոսքեր: Նրանք նշել են, որ արվեստի ներկայացված գործերը փոխանցում են արեւ ու ջերմություն:
Նշենք, որ չնայած Մարինե Մանուկյանը սկսել է ստեղծագործել տարիներ առաջ, սակայն արդեն բազմաթիվ ստեղծագործությունների հեղինակ է:
Նրա ստեղծագործություններն Ազգային ժողովում կցուցադրվեն մեկ ամիս:
