Ֆրանսիայի ներկայիս նախագահ Էմանուել Մակրոնը, նախնական տվյալներով, հաղթում է նախագահական ընտրությունների երկրորդ փուլում։
Նա ստացել է ձայների 57,6%-ը, հաղորդում է Ռիա Նովոստին՝ հղում անելով ֆրանսիական BFMTV-ի տվյալներին։։ Նրա մրցակից Մարին Լը Պենը հավաքել է ձայների 42,4%-ը։
France 24-ի տվյալներով էլ Մակրոնը ստացել է ձայների 58,2 տոկոսը, Լը Պենը՝ 41,8 տոկոսը։
Սպասվում է, որ առաջիկայում երկու քաղաքական գործիչներն էլ քվեարկության արդյունքների վերաբերյալ հայտարարություններով հանդես կգան։
Մակրոնը պաշտոնավարում է 2017 թվականից, երբ առաջին անգամ հաղթեց Լը Պենին։ Ժակ Շիրակից հետո նա Ֆրանսիայի առաջին նախագահն է, ով հաղթում է երկրորդ ժամկետով։
44 տարեկանում Մակրոնը նաև մնում է ամենաերիտասարդ նախագահը Հինգերորդ Հանրապետության պատմության մեջ, որը ստեղծվել է ավելի քան կես դար առաջ գեներալ Շառլ դը Գոլի կողմից: