Վերջին 4 տարիների ընթացքում տեղի են ունեցել միջազգային և տարածաշրջանային ճգնաժամեր։
Այս մասին Բաքվում Ադրբեջանի, Վրաստանի և Թուրքիայի արտգործնախարարների 9-րդ եռակողմ հանդիպման արդյունքներով ճեպազրույցի ժամանակ ասել է Թուրքիայի ԱԳ նախարար Հաքան Ֆիդանը։
Նա շարունակել է նաև գոյություն չունեցող միջանցքի մասին թուրք-ադրբեջանական թեզը՝ նշելով. «Նաև այս տարիների ընթացքում Ադրբեջանը «վերականգնել է իր տարածքային ամբողջականությունը», Վրաստանը դարձել է Եվրամիության անդամության թեկնածու: Անհրաժեշտ քննարկումներ են անցկացվել երկրների միջև համագործակցությունը խթանելու համար, մենք պատրաստ ենք հնարավոր ամեն ինչ անել յուրաքանչյուր հարցում: Հարավային Կովկասում խաղաղության վերականգնումը տարածաշրջանային և գլոբալ նշանակություն ունի։ Այս առումով մենք ակնկալում ենք համընդհանուր աջակցություն «Զանգեզուրի ուղու» բացմանը»։
Ավելի վաղ Բաքվում ընթացել էր Ադրբեջանի, Թուրքիայի և Վրաստանի արտգործնախարարների 9-րդ եռակողմ հանդիպումը: