Ազգային ժողովը փետրվարի 28-ի նիստում երկրորդ ընթերցմամբ քննարկել է մի շարք օրենսդրական նախաձեռնություններ:
«Հայաստանի Հանրապետության քրեական օրենսգրքում փոփոխություններ կատարելու մասին» եւ «Պաշտպանության մասին» ՀՀ օրենքում լրացում կատարելու մասինե օրինագծերի փաթեթի հեղինակը «Քաղաքացիական պայմանագիր» խմբակցության պատգամավոր Ալխաս Ղազարյանն է:
«Նախաձեռնության ընդունման արդյունքում օրենսդրորեն կամրագրվի աշխարհազորայինների` որպես զինվորական ծառայության սահմանված կարգի դեմ ուղղված հանցագործության սուբյեկտի կարգավիճակը, ինչը հնարավորություն կընձեռի պատշաճ իրավական գնահատական տալ վերջիններիս կողմից թույլ տրված խախտումներին»,- ընդգծել է նախաձեռնության հեղինակը: Նրա տեղեկացմամբ առաջինից երկրորդ ընթերցում առաջարկներ չեն ներկայացվել:
Պետական-իրավական հարցերի մշտական հանձնաժողովի դրական եզրակացությունը ներկայացրել է հանձնաժողովի անդամ Արփինե Դավոյանը: Ողջունելով նախաձեռնությունը` պատգամավորը հորդորել է կողմ քվեարկել:
ՀՀ արդարադատության նախարարի տեղակալ Արա Մկրտչյանը ներկայացրել է նախաձեռնության վերաբերյալ Կառավարության դրական դիրքորոշումը: «Ունենք իրավիճակ, երբ կա աշխարհազոր, որն իրականացնում է զինծառայողներին հավասար պարտավորություններ, սակայն քրեորեն սահմանված չէ պատասխանատվություն հանրորեն վտանգավոր արարք կատարելու դեպքում»,- ընդգծել է փոխնախարարը:
Պատգամավորները երկրորդ ընթերցմամբ քննարկել են նաեւ ««Հարկային ծառայության մասին» օրենքում լրացումներ եւ փոփոխություն կատարելու մասին» եւ կից ներկայացված օրինագծերի փաթեթը:
ՀՀ պետական եկամուտների կոմիտեի նախագահի տեղակալ Արթուր Մանուկյանի խոսքով նախաձեռնությամբ կարգավորվում է հարկային եւ մաքսային ծառայություներում ժամանակավոր թափուր պաշտոնների նշանակված անձանց հարցը: Առաջինից երկրորդ ընթերցում պատգամավորներն առաջարկներ չեն ներկայացրել. Կառավարությունը հանդես է եկել տեխնիկական բնույթի առաջարկներով:
Տնտեսական հարցերի մշտական հանձնաժողովի նախագահի տեղակալ Բաբկեն Թունյանը բարձրաձայնել է հանձնաժողովի դրական եզրակացությունը:
