Հանրապետության նախագահ Արմեն Սարգսյանն Ազգային տոնի առթիվ շնորհավորական ուղերձ է հղել Ճապոնիայի կայսերը:
Նախագահ Սարգսյանը համոզմունք է հայտնել, որ Հայաստանի և Ճապոնիայի միջև փոխադարձ հարգանքի և վստահության վրա հիմնված բարեկամական հարաբերությունները կշարունակեն խորանալ և ընդլայնվել:
Հանրապետության նախագահ Արմեն Սարգսյանը Ճապոնիայի կայսերը և կայսերական ընտանիքին մաղթել է քաջառողջություն և հաջողություն, իսկ Ճապոնիայի բարեկամ ժողովրդին՝ հարատև խաղաղություն և բարօրություն:
Վարչապետ Նիկոլ Փաշինյանը շնորհավորական ուղերձ է հղել Ճապոնիայի վարչապետ Սուգա Յոշիհիդեին՝ երկրի ազգային տոնի առթիվ: Ուղերձում ասված է.
«Ձերդ Գերազանցություն,
Հայ և ճապոնացի բարեկամ ժողովուրդների միջև հաստատված ջերմ հարաբերությունները շարունակ նպաստում են մեր երկրների համագործակցության ամրապնդմանը։ Հայաստանի և Ճապոնիայի միջպետական հարաբերություններին բնորոշ են բարձր մակարդակի քաղաքական երկխոսությունը, փոխադարձ հարգանքը և փոխվստահությունը: Մենք հետամուտ ենք Ճապոնիայի հետ էլ ավելի ամուր հարաբերությունների կառուցմանը և երկկողմ օրակարգի առավել ընդլայնմանը։ Հայաստանը և Ճապոնիան նրբանկատ են միմյանց համար զգայուն խնդիրների առնչությամբ և արդյունավետորեն համագործակցում են միջազգային հարթակներում:
Վստահ եմ, որ հաղթահարելով COVID-19 համաճարակի արդյունքում ստեղծված դժվարությունները՝ Ճապոնիայի բարեկամ ժողովուրդը կշարունակի իր հաստատուն ընթացքը ներդաշնակ հասարակության կառուցման գործում:
Թույլ տվեք հայտնել երախտագիտությունս Ճապոնիայի կառավարության կողմից Հայաստանին տրամադրվող առողջապահական և տնտեսական աջակցության, ինչպես նաև՝ Լեռնային Ղարաբաղի բնակչությանը հատկացված մարդասիրական օգնության համար։
Մաղթում եմ Ձերդ Գերազանցությանը քաջառողջություն և հաջողություններ, իսկ Ճապոնիայի բարեկամ ժողովրդին՝ խաղաղություն և բարօրություն»: