ՀՀ նախկին մարդու իրավունքների պաշտպան Արման Թաթոյանի հետ 20 աշխատակից հեռացել է։ Այսօր այս մասին Կառավարությունում լրագրողների հետ ճեպազրույցի ժամանակ հայտնեց ՀՀ նորընտիր ՄԻՊ Քրիստիննե Գրիգորյանը:
«Կարևորագույն ստորաբաժանումներ ունենք, որտեղ ուղղակի աշխատող չունենք»,- ասաց պաշտպանը։
Նրա խոսքով՝ ՄԻՊ-ում 50 տոկոսից պակաս համալրում կա այնպիսի սուղ հաստիքներով ստորաբաժանումում, որը վերաբերում է զինծառայողների և նրանց ընտանիքի անդամների իրավունքների պաշտպանության հարցերին։
Սակայն այս ամենը Գրիգորյանը սաբոտաժ չհամարեց. «Որոշ աշխատողների հետ հնարավորություն ունեցել եմ խոսելու: Նրանք տարբեր անձնական պատճառներ են նշել, ես հարգանքով եմ մոտենում»:
Հիշեցնենք, որ օրերս ավարտվեց ՀՀ մարդու իրավունքների՝ արդեն նախկին պաշտպան Արման Թաթոյանի լիազորությունների ժամկետը: ՀՀ ՄԻՊ-ի գործառույթները կատարում է ՀՀ արդարադատության նախկին փոխնախարար Քրիստիննե Գրիգորյանը:
