Կառավարության շենքի դիմաց ակցիա են իրականացնում պատերազմի հետևանքով անհետ կորած զինծառայողների հարազատները։ Ակցիայի մասնակիցներից Կարինե Ղազարյանը լրագրողների հետ զրույցում ասաց, որ որդուց արդեն 80 օր լուր չունի։ Ընդգծեց, որ եկել են ոչ թե բողոքի ցույցի, այլ ընթացիկ հարցերի քննարկման, անկախ նրանից, որ ոչ աշխատանքային օր է՝ խոստացել են ընդունել իրենց: 

«Գոնե մեզ թիվ ասեն, անուն ասեն, որ իմանանք գերիների մեջ փնտրենք, թե անտառներում»,- ասաց ակցիայի մասնակիցը՝ նշելով, որ տանը նստել չեն կարող, նման ակցիաների միջոցով անընդհատ զգոն են պահում ղեկավարությանը, գալիս են հույսի, լույսի ակնկալիքով։

Ակցիայի մասնակիցն ասաց, որ ՀՀ վարչապետը մեկ շաբաթ առաջ հանձնարարական էր տվել նաև Ազգային անվտանգությանը զբաղվել անհետ կորածների հարցով, բայց մինչև օրս նորություն չունեն։ Գևորգյանը հայտնեց, որ իրենց պահանջներից է նաև  գերիների տվյալների հրապարակումը։

Ծնողներից մեկի պնդմամբ էլ՝ գրեթե մեկ ամիս Ազգային անվտանգության ծառայությունը չի զբաղվում իրենց խնդրով։ «Իմ երեխայից զանգ ա եղել, քրոջս տղան Ֆրանսիայից զանգել ա, վերցրել են թուրքերը, էդ փաստը դրել եմ ԱԱԾ-ի դեմ, որ պիտի գտնեն, մի ամիս ա՝ ոչ մի բան, ամեն օր զանգում եմ, ասում են՝ աշխատում ենք էդ ուղղությամբ ու ոչ մի բան»։