Ճապոնական Suzuki ավտոմոբիլային կոնցեռնը որոշել է դադարեցնել ավտոմեքենաների և մոտոցիկլետների մատակարարումները Ռուսաստան։ Այս մասին հինգշաբթի հայտնել է Kyodo գործակալությունը։
Նշվում է, որ համապատասխան որոշումը կայացվել է Ռուսաստանի Դաշնության դեմ կիրառված տնտեսական պատժամիջոցների պատճառով։
Այս շաբաթվա սկզբին ճապոնական Nikkei բիզնես թերթը հայտնել էր, որ ճապոնական Honda և Mazda ավտոարտադրողները որոշել են դադարեցնել իրենց արտադրանքի արտահանումը Ռուսաստան՝ կապված Ուկրաինայում ստեղծված իրավիճակի և Ռուսաստանի դեմ սահմանված պատժամիջոցների հետ։
Honda-ն կհրաժարվի մասնավորապես մեքենաների և մոտոցիկլետների արտահանումից, իսկ Mazda-ն կդադարեցնի Ռուսաստանի Դաշնության տարածքում գտնվող իր գործարաններին պահեստամասերի և բաղադրիչների մատակարարումը։ Հաղորդվել է նաև, որ Nissan-ը սկսել է կրճատել արտադրության ծավալները Ռուսաստանի Դաշնության տարածքում գտնվող իր ձեռնարկություններում, սակայն ներկայումս շարունակում է ավտոմեքենաներ արտադրել և վաճառել ռուսական շուկայում։
Աշխարհի խոշորագույն ավտոմոբիլային կոնցեռնը՝ Toyota Motor-ը, նույնպես ավելի վաղ որոշել էր դադարեցնել իր մեքենաների արտադրությունը Ռուսաստանում բաղադրիչների պակասի պատճառով։ Ընկերության հաղորդագրության համաձայն՝ Սանկտ Պետերբուրգի գործարանում արտադրությունը ժամանակավորապես կդադարեցվի մարտի 4-ից։