Սեպտեմբերի 17-ին անցկացված Երևանի ավագանու ընտրության նախնական արդյունքներով ավագանու կազմ անցած ուժերից որևէ մեկը չունի մեծամասնություն և չի կարող ստանալ քաղաքապետի աթոռը։ Ավելի քան 234 հազար ընտրողների ձյաները բաշխվել են այսպես.
- «Քաղաքացիական պայմանագիր»-ը ստացել է ավելի քան 75 հազար քվե կամ ձայների 32,5 տոկոսը,
- «Ազգային առաջընթաց»-ը՝ ավելի քան 43 հազար քվե կամ ձայների 18,9 տոկոսը,
- «Մայր Հայաստան» դաշինքը՝ 15,4 տոկոսը,
- «Հանրապետություն»-ը՝ 11,3 տոկոսը, «Հանրային ձայն»-ը՝ 9,7 տոկոսը։
- Մյուս կուսակցությունների հավաքած ձայներն անցողիկ 4 տոկոսից պակաս էին։
Վերջնական արդյունքները ԿԸՀ-ն կհրապարակի սեպտեմբերի 24-ին՝ քվեարկությունից 1 շաբաթ անց, այդ ժամանակ պարզ կլինի նաև մանդատների վերջնական բաշխումը, մինչ այդ Ընտրական օրենսգրքում եղած բանաձևի ու քվեարկության նախնական թվերի միջոցով կարելի է ստանալ հետևյալ պատկերը.
Երևանի ավագանու 65 մանդատներից 24-ը կստանա «Քաղաքացիական պայմանագիր»-ը, 14-ը՝ «Ազգային առաջընթաց»-ը, 12-ը՝ «Մայր Հայաստան»-ը, 8-ը՝ «Հանրապետություն»-ը և 7-ը՝ «Հանրային ձայն» կուսակցությունը։
«Շեմը հաղթահարած քաղաքական ուժերը պիտի սպասեն մինչև գործող ավագանու լիազորությունների ավարտը, ինչը ենթադրում է հոկտեմբերի 10: Հոկտեմբերի 10-ին նորընտիր ավագանին պետք է գումարի առաջին նիստը, եթե որևէ քաղաքական ուժ չունի 50+ մանդատ, ապա այդ դեպքում արդեն ավագանին պետք է երկշաբաթյա ժամկետում ընտրի քաղաքապետ», - ներկայացրեց ԿԸՀ նախագահ Վահագն Հովակիմյանը:
Ըստ Մարությանի՝ քաղաքային իշխանությունը պետք է ստանձնի իր թիմը, իսկ մյուսները՝ չնայած կքվեարկեն իր օգտին, պաշտոններ չեն ստանա և կդառնան ընդդիմություն։ Հակառակ դեպքում, Հայկ Մարությանն առաջարկում է գնալ նոր ընտրությունների՝ քվորում չապահովելով և տապալելով առաջին նիստը, ինչի հնարավորությունը 3 ուժերը ունեն։ Մարությանի այս առաջարկն, ըստ էության, խառնեց խաղաթղթերը։
Մինչ այդ «Հանրային ձայն»-ի փաստացի առաջնորդ, ծանր հանցանքների համար հետախուզվող Վարդան Ղուկասյանն հայտարարել էր՝ պատրաստ են կոալիցիա կազմել «Ազգային առաջընթաց»-ի ու «Մայր Հայաստան»-ի հետ՝ վերցնելով քաղաքապետարանում վերահսկողական պաշտոններ։
«Ես ասում եմ՝ եթե գա մի պահ, որ ես զգամ, որ՝ ոչ, երկու կողմերն ասում են՝ չէ, մենք չենք ուզում ձեր մոտից քաղաքապետ, դուք ամենաքիչ ձայներն եք հավաքել, ես դրան էլ եմ համաձայն, բարի, այդ դեպքում եկեք որոշենք՝ ձեր երկուսից ով կլինի քաղաքապետ, ես դեմ չեմ: Ձեզանից ցանկացածին ես կողմ եմ, բայց մեկ պայմանով՝ վերահսկողական բոլոր վարչությունները տրվելու են «Հանրային ձայն»-ին: Դուք դառնում եք քաղաքապետ, վերահսկողական ապարատը անցնում է իմ կադրերին, այսինքն, ինձ: Հայկ Մարության Դուք քաղաքապե՞տ եք ուզում դառնալ, ես կողմ եմ, եկեք, նստեք քաղաքապետ, կարող եմ օբյեկտիվ ասել, որ Դուք շատ թույլ քաղաքապետ եք, մենք տեսանք Ձեր կառավարումը: Թևանյանն է ուզո՞ւմ, թող նստի Թևանյանը, դրան էլ եմ կողմ, նորից եմ կրկնում՝ վերահսկողական ծառայությունները իմն են, և պայմանագրով իշխանությունը, այսինքն կառավարումը հանձնելով ձեզ, պարոնայք քաղաքապետեր, դուք կստորագրեք», - հայտարարել է Ղուկասյանը:
«Մայր Հայաստան»-ի առաջնորդ Անդրանիկ Թևանյանն, իր հերթին, նշել է. - «Մենք պատրաստ ենք քննարկել այդ հարցը և աջակցել որևէ մեկին, տվյալ դեպքում եթե Մարությանի անունն է տրվում, մենք խնդիր չունենք էդ մասով քննարկելու, բայց նախապայմանն այն է կամ հիմնական սկզբունքն այն է, որ թեկնածուն կիսի մեր մոտեցումն ամբողջական իշխանափոխության ծրագիր իրականացնելու մասով: Սա է, ուրիշ որպես այդպիսին բանակցություններ, քննարկումներ չեն եղել»:
Դաշինքում վստահ են՝ քաղաքապետի պաշտոնը վերցնելուց հետո կկարողանան փոխել նաև իշխանությունը, Թևանյանի խոսքով՝ Երևանում կենտրոնացած են վարչական մեծ լծակներ, թե ինչպե՞ս պետք է դրանք նպաստեն իշխանափոխությանը, նա առայժմ չի հստակեցնում։
«Երևանը հնարավոր է օգտագործել որպես իշխանափոխության գործիք, հիմա մենք բոլորս համոզվում ենք դրանում, ես էլ ասում եմ, որ հնարավոր է և անհրաժեշտ, որպեսզի ամբողջական իշխանափոխություն լինի, որպեսզի Հայաստանի Հանրապետությունը գոյություն ունենա», - ընդգծել է Թևանյանը:
«Քաղաքացիական պայմանագիրն» էլ հայտարարել է՝ առաջիկա անելիքների մասին կխոսեն մոտակա օրերին:
