ՀՀ նախագահի թեկնածու Վահագն Խաչատուրյանը նախագահի՝ Սահմանադրությամբ ամրագրված լիազորությունները բավարար է համարում, որ նախագահը հանդես գա որպես իշխանության գլուխ: Խաչատուրյանը նման տեսակետ հայտնեց ԱԺ-ում իր թեկնածության հարցի քննարկմանը:
ՔՊ խմբակցության պատգամավոր Արուսյակ Ջուլհակյանը նշեց՝ հանրային տիրույթում մի վարկած է առաջ քաշվում, թե նախագահի լիազորությունները շատ սահմանափակ են, գործունեության լայն դաշտ չեն տալիս նախագահին: Պատգամավորը հետաքրքրվեց՝ արդյոք նախագահի լիազորությունները թույլ չեն տալի՞ս, որ նախագահն արդյունավետ գործի:
Նախագահի թեկնածու Վահագն Խաչատուրյանը արձագանքեց. «Կարևոր եմ համարում նշել, որ որևէ նշանակություն չունի լիազորությունները, եթե դուք ուզում եք աշխատել: Եվ Սահմանադրությամբ կան լիարժեք լիազորություններ, որոնք հնարավորություն են տալիս ՀՀ նախագահի ինստիտուտի կայացմանը, նորից եմ կրկնում՝ այն լիազորությունների շրջանակում, որ տրված է Սահմանադրությամբ: Ուղղակի այստեղ մեկ ուրիշ խնդիր կա. պետք է կարողանալ գնահատել, որ մենք ապրում ենք ՀՀ-ում, որի կառավարման համակարգը խորհրդարանական է, և խորհրդարանի դերը գերակայող է՝ պետական կառավարման որոշումների ընդունման, կայացման գործում: Սա չի նշանակում, որ Հանրապետության նախագահն այստեղ անելիք չունի»:
Նա նշեց՝ մոտավորապես պատկերացնում է, թե դա ինչպես պետք է արվի, ոչ մի սահմանափակում չկա, որ երկրի նախագահը նաև օրենսդրական գործունեությանը հետևի, ի վերջո ինքն է օրենքները հաստատում: Ըստ Խաչատուրյանի՝ խորհրդարանում թափանցիկ աշխատանքային մթնոլորտ է, և նախագահի ինստիտուտը քննարկումներին մասնակից դառնալու և այլ հնարավորություններ ունի:
Խաչատուրյանը ընդգծեց՝ նախագահը մի կարևոր առաքելություն ունի՝ համերաշխության խնդիրը: Ըստ նրա՝ նախագահը պարտավոր է խոսել քաղաքական ուժերի, ՀԿ-ների, տարբեր խմբերի, միավորումների հետ: «Դա իր պարտականությունն է: Կարծում եմ՝ պակաս կարևոր չէ: Դա միգուցե կարող է հետաքրքիր չթվալ, բայց առավել ևս այսօրվա պայմաններում, երբ մենք մեծ դժվարությունների մեջ ենք, այդ խնդիրը լուծելու պարտավորությունը ՀՀ նախագահն ունի»,-ասաց նա:
Ըստ Խաչատուրյանի՝ ի վերջո, այն մարդը, որը կանգնում է խորհրդարանի ամբիոնի մոտ՝ որպես ՀՀ նախագահի թեկնածու, պետք է հաշվի առնի, թե որ երկրի նախագահ է ուզում դառնալ: «Սա ՀՀ այսօրվա կառավարման, քաղաքականության իրականությունն է: Եվ սրա հետ հաշվի չնստելը դեռևս չի նշանակում, որ դուք ճիշտ եք, հաշվի չնստելն ուղղակի նշանակում է, որ դուք կարող եք պարզապես խուսափել կամ չհավանել: Բայց, երբ որ հարցը լուծված է, ցանկացած դեպքում, կառավարման աքսիոման է ասում, որ պետք է ուղղակի կատարեք այդ պարտականությունները: Կարծում եմ, որ ՀՀ նախագահի դերը, լիազորությունները այս Սահմանադրության շրջանակում, բավարար, որ նա լիարժեք հանդես գա որպես իշխանության գլուխ»,-ասաց Խաչատուրյանը:
