Ինչպես արդեն հայտնել ենք, երեկ ուշ երեկոյան Ռուսաստանը պաշտոնապես ճանաչեց Դոնեցկի և Լուգանսկի Ժողովրդական Հանրապետությունների անկախությունը և նրանց հետ կնքեց բարեկամության, համագործակցության և աջակցության պայմանագրեր։ Համապատասխան փաստաթղթերը երկուշաբթի երեկոյան արդեն ստորագրել է ՌԴ նախագահ Վլադիմիր Պուտինը։ Այս որոշումը ոչ միանշանակ է ընդունվել աշխարհի տասնյակ երկրների, բազմաթիվ միջազգային կառույցների կողմից:
ԵԱՀԿ նախագահ և Լեհաստանի արտաքին գործերի նախարար Զբիգնև Ռաուն, ԵԱՀԿ գլխավոր քարտուղար Հելգա Շմիդը, ԵԱՀԿ Խորհրդարանական վեհաժողովի նախագահ Մարգարետա Սյոդերֆելտը և Վեհաժողովի գլխավոր քարտուղար Ռոբերտո Մոնտելլան միաբերան հայտարարել են, որ Դոնեցկի և Լուգանսկի անկախությունը ճանաչելու Ռուսաստանի որոշումը իրենք համարում են որպես Մինսկի համաձայնագրերի ակնհայտ խախտում:
«Դոնեցկի և Լուգանսկի Ժողովրդական Հանրապետությունների վերաբերյալ Ռուսաստանի որոշումները ծանր և հեռուն գնացող հետևանքներ կունենան»,- հայտարարել է ՄԱԿ-ում Մեծ Բրիտանիայի մշտական ներկայացուցիչ Բարբարա Վուդվորդը ՄԱԿ-ի Անվտանգության խորհրդի նիստում։
ՄԱԿ-ում ԱՄՆ մշտական ներկայացուցիչ Լինդա Թոմաս-Գրինֆիլդը հայտարարել է, որ Դոնբասում ռուս զինվորականներին խաղաղապահներ անվանելը «անհեթեթություն» է։
«Ֆրանսիան կարծում է, որ Ռուսաստանը պետք է գործերով հաստատի Ուկրաինայի շուրջ ստեղծված իրավիճակում երկխոսության պատրաստակամության իր խոսքերը՝ վերանայելով ինքնահռչակ Դոնեցկը և Լուգանսկը ճանաչելու որոշումը»,- ասել է ՄԱԿ-ում Ֆրանսիայի մշտական ներկայացուցիչ Նիկոլա դե Ռիվյերը։
Թուրքիայի ԱԳՆ-ն հայտարարել է, որ Ռուսաստանի կողմից Դոնեցկի և Լուգանսկի ճանաչումը անընդունելի քայլ է, որը խախտում է մինսկյան պայմանավորվածությունները և Ուկրաինայի ամբողջականությունը։
Հունաստանի ԱԳՆ-ն Ռուսաստանի որոշումը համարել է օրենքի խախտում, նշել, որ խորհրդակցությունների կունենա դաշնակիցների ու գործընկերների հետ այդ հարցով:
Ավստրալիան էլ, գործընկերների հետ միասին, պատրաստ է արագ և կոշտ պատժամիջոցներ սահմանել Ռուսաստանի Դաշնության ֆիզիկական և իրավաբանական անձանց դեմ՝ կապված դոնեցկի և Լուգանսկի ճանաչման հետ, ասվում է երկրի ԱԳՆ կայքում հրապարակված հաղորդագրության մեջ։
Պորտուգալիայի վարչապետ Անտոնիո Կոստան Twitter-ի իր միկրոբլոգում դատապարտել է Ռուսաստանի որոշումը ։
Միացյալ Նահանգներն էլ կարծում է, որ Դոնեցկի և Լուգանսկի անկախությունը ճանաչելու Ռուսաստանի որոշումը վկայում է այն մասին, որ Ուկրաինայի շուրջ ստեղծված իրավիճակում Մոսկվան «ռազմական լուծման կողմնակից է»: Այս մասին ռուսական լրատվամիջոցներին մեկնաբանել են ԱՄՆ-ի Պետդեպարտամենտից:
