2022 թվականի մարտի 27-ին Արարատի մարզի Վեդի խոշորացված համայնքում ավագանու արտահերթ ընտրություններ կկայանան:
ՀՀ կենտրոնական ընտրական հանձնաժողովի կայքից տեղեկանում ենք, որ Վեդիում ընտրություններին մասնակցելու է 2 ուժ՝ «Քաղաքացիական պայմանագիր» և «Իմ հզոր համայնք» կուսակցությունները:
Հիշեցնենք, որ դեկտեմբերի 5-ին Վեդիում արդեն կայացել էին համայնքապետի ընտրություններ, որին մասնակցել էր 3 ուժ՝ «Քաղաքացիական պայմանագիր», «Հանրապետություն» և «Իմ հզոր համայնք» կուսակցությունները: Ամենաշատ քվեները ստացել էր «Իմ հզոր համայնք» կուսակցությունը, սակայն այն չէր հատել 50+ շեմը, ըստ այդմ՝ հնարավորություն չէր ունեցել միայնակ իշխանություն ձևավորելու:
Ինչից հետո՝ դեկտեմբերի 16-ին, «Քաղաքացիական պայմանագիր» և «Հանրապետություն» կուսակցությունների ավագանու բոլոր անդամներն ինքնաբացարկի դիմումներ էին ներկայացրել, որի հետևանքով նշանակվեց նոր ընտրություն:
2021-ի ընտրությունների ժամանակ «Քաղաքացիական պայմանագիր» կուսակցության համայնքապետի թեկնածուն Վեդիի համայնքապետի պաշտոնակատար Գարիկ Սարգսյանն էր, իսկ «Իմ հզոր համայնք» կուսակցության թեկնածուն՝ Սիսավան համայնքի ղեկավար Սպարտակ Թարթիկյանը:
