Հայաստանն ունի պատրաստակամություն՝ շարունակել համագործակցությունը ՆԱՏՕ-ի հետ, լրագրողների հետ զրույցում ասաց ՀՀ արտաքին գործերի փոխնախարար Վահան Կոստանյանը։
«Հայաստանը տարբեր ձևաչափերով համագործակցում է ՆԱՏՕ-ի հետ։ Ունենք պատրաստակամություն՝ շարունակել այս գործընթացը»,- ասաց նա։
Դիտարկմանը, թե Գյունտեր Ֆելինգերի կոչը Հայաստանին՝ միանալ ՆԱՏՕ-ին, եղավ այն բանից հետո, երբ Նիկոլ Փաշինյանը հայտարարեց, որ կարող է մի օր արթնանանք ու տեսնենք, որ Ռուսաստանը տարածաշրջանում չէ, Կոստանյանը նշեց՝ չի կարող ասել՝ արդյոք դրանք փոխկապակցվա՞ծ են, թե՞ ոչ։
Կոստանյանը հավելեց նաև, որ Գյունտեր Ֆելինգերը ոչ թե ՆԱՏՕ բարձրաստիճան պաշտոնյա է, այլ՝ հասարակական կազմակերպության ղեկավար, որի անվանման մեջ տեղ է գտել ՆԱՏՕ բառը։
Նշենք, որ Հայաստանը մասնակցում է ՆԱՏՕ-ի «Գործընկերություն հանուն խաղաղության» ծրագրին, ինչպես նաև հանդիսանում է Եվրոատլանտյան գործընկերության խորհրդի անդամ, որտեղ իրականացնում է գործընկերության անհատական գործողությունների ծրագրեր (IPAP):
