ՀՀ ազգային ժողովի փոխնախագահ, ԱԺ նախագահի լիազորությունները կատարող Հակոբ Արշակյանը պնդում է՝ խորհրդարանում ՀՀ նախագահի ընտրության գործընթացը լեգիտիմ է, իշխանությունները ստացել են բավարար քվեներ, որ ձևավորեն կառավարություն և ընտրեն նախագահ: Արշակյանը նման տեսակետ հայտնեց ԱԺ-ում լրագրողների հետ ճեպազրույցում՝ անդրադառնալով նախագահի ընտրության գործընթացին ընդդիմադիրների չմասնակցելուն և արված հայտարարություններին:
«Պատմական իրադարձություն է այսօր, որովհետև ՀՀ նախագահ ենք ընտրում: Եվ դա տեղի է ունենում 2018 թվականի հեղափոխությունից հետո տեղի ունեցած խորհրդարանական բաց, թափանցիկ ընտրությունների արդյունքում ձևավորված ԱԺ-ի պատգամավորների ընտրությամբ: Այսինքն՝ այն հրապարակումները, կարծիքները, նաև ակտերը, որոնցով փորձ է արվում որևէ շղարշ գցել լեգիտիմության առումով, ցանկանում եմ ասել, որ ժողովրդի ձայնը ստացած ԱԺ-ի ուժերն են ընտրում նախագահ, և դրանով իսկ ապահովված է այսօրվա գործընթացի ամբողջ լեգիտիմությունը»,-ասաց Արշակյանը:
Նա հավելեց՝ իհարկե քաղաքական ուժերն իրավունք ունեն մասնակցելու կամ չմասնակցելու ընտրություններին: Արշակյանի խոսքով՝ այսպիսով ժողովրդի կողմից ընտրված ԱԺ-ի պատգամավորներն են, որոնք իրենց ցանկությամբ մասնակցում են կամ չեն մասնակցում ընտրություններին:
Անդրադառնալով տեսակետներին, թե նախագահի ընտրության գործընթացը լեգիտիմ չէ, քանի որ մեկ ուժ է մասնակցում՝ Արշակյանն ասաց, որ նույն հաջողությամբ կարելի էր պնդել, թե իշխանությունները լեգիտիմ չեն, քանի որ առանց կոալիցիայի, միանձնյա են կառավարում երկիրը: «Իշխանությունները ստացել են բավարար ձայնով քվեներ, որպեսզի ձևավորեն թե կառավարություն, թե ընտրեն նախագահ, որպեսզի սահմանադրական օրենքներ ընդունեն և օրենսդրական դաշտն ամբողջությամբ ապահովեն: Եվ դրա լեգիտիմությունը ոչ թե որոշվում է այս կամ այն ընդդիմադիր ուժի հայտարարությամբ, այլ ՀՀ Սահմանադրությամբ»,-ասաց ԱԺ փոխնախագահ, ԱԺ նախագահի լիազորությունները կատարող Հակոբ Արշակյանը:
ԱԺ-ում Հանրապետության նախագահի ընտրության գործընթացին ընդդիմությունը չի մասնակցում: Ընտրության առաջին փուլով «Քաղաքացիական պայմանագիր» խմբակցության թեկնածու Վահագն Խաչատուրյանը չէր ընտրվել, չէր ստացել բավարար թվով ձայներ: Խորհրդարանում անցկացվել է ընտրության երկրորդ փուլը:
Երկրորդ փուլով Վահագն Խաչատուրյանն ընտրվեց ՀՀ նախագահ:
ԱԺ 107 պատգամավորներից քվեարկությանը մասնակցել է 71 պատգամավոր, անվավեր քվեաթերթիկներ չեն եղել: Ձայները բաշխվել են հետևյալ կերպ՝ կողմ 71, դեմ 0:
«Ազնվորեն հուզումնալից է ինձ համար, շնորհակալություն վստահության համար, երախտապարտ եմ բոլորիդ ինձ այսպիսի մեծ վստահության քվե տալու համար: Երևի դեռ չեմ գիտակցում պահի կարևորությունը: Համոզված եմ, որ ժամանակի ընթացքում կվերագնահատեմ և այս րոպեները հիշելով կգնահատեմ նաև մեր պետությանը, ձեզ բոլորիդ»,- ասաց Խաչատուրյանը:
Ներկայացնում ենք Խաչատուրյանի աշխատանքային կենսագրությունը.
1982-1992 թվականներին Երևանի Ժողվրդական տնտեսության ինստիտուտում իրականացրել է գիտա-մանկավարժական գործունեություն
1982-1990 թվականներին աշխատել է «Հրազդանմեքենա» արտադրական միավորումում՝ որպես տնտեսագետ, տնտեսական հետազոտությունների լաբորատորիայի վարիչ
1990-1992 թվականներին եղել է «Մարս» արտադրական միավորման բաժնի վարիչ, գլխավոր տնօրենի տեղակալ
1990-1995 թվականներին՝ Երևանի քաղաքային խորհրդի պատգամավոր
1992 թվականի դեկտեմբերի 22 - 1996 թվականի փետրվարի 22 եղել է Երևանի քաղաքային խորհրդի գործադիր կոմիտեի նախագահ՝ Երևանի քաղաքապետ
1995-1999 թվականներին՝ ՀՀ Ազգային ժողովի պատգամավոր. եղել է ԱԺ ֆինանսավարկային, բյուջետային և տնտեսական հարցերի մշտական հանձնաժողովի անդամ, ԱԺ «Հանրապետություն» խմբակցության անդամ։
1996-1998 թթ. Վահագն Խաչատուրյանը զբաղեցրել է ՀՀ նախագահի խորհրդականի պաշտոնը:
2000թ. – հանդիսացել է «Արմատ» ժողովրդավարության և քաղաքացիական հասարակության զարգացման կենտրոնի հիմնադիր անդամ:
2002 թվականից «Քաղաքագիտական, իրավագիտական, տնտեսագիտական հետազոտությունների կենտրոն» փոխնախագահն է:
2006 թ. ընտրվել է «Այլընտրանք» հասարակական-քաղաքական նախաձեռնության հիմնադիր անդամ:
2008-2013 թվականներին՝ Հայ ազգային կոնգրեսի՝ Մալաթիայի տարածքային կառույցի ղեկավար, Կոնգրեսի տնտեսական հանձնախմբի անդամ։
2019- 2021 թթ․ «Հայէկոնոմբանկի» խորհրդի անդամ:
2018-ից սերտորեն սկսել է համագործակցել Քաղաքացիական պայմանագիր կուսակցության հետ:
2021 թ. օգոստոսի 4-ին Վահագն Խաչատուրյանը նշանակվեց Բարձր տեխնոլոգիական արդյունաբերության նախարար՝ այդ պաշտոնում փոխարինելով Հայկ Չոբանյանին:
Ազգային ժողովի կողմից Հայաստանի Հանրապետության նախագահ ընտրված Վահագն Խաչատուրյանը պաշտոնը կստանձնի ԱԺ հատուկ նիստում: Խաչատուրյանի ընտրության արդյունքները հայտնելուց հետո ԱԺ փոխնախագահ, ԱԺ նախագահի լիազորությունները կատարող Հակոբ Արշակյանը հիշեցրեց, որ Սահմանադրության և ԱԺ կանոնակարգ օրենքի համաձայն՝ Հանրապետության նախագահը պաշտոնը ստանձնում է ԱԺ հատուկ նիստում, որն արտահերթ ընտրության դեպքում գումարվում է Հանրապետության նախագահի ընտրվելուց հետո 10-րդ օրը:
Հատուկ նիստի անցկացման կարգը սահմանվում է ԱԺ նախագահի առաջարկությամբ, խորհրդի որոշմամբ: Այսպիսով` Աժ խորհրդի որոշմամբ՝ հատուկ նիստը կգումարվի:
