Ընդդիմությունն այսօր վաղ առավոտից վերսկսել է անհնազանդության ակցիաները: «Դիմադրություն» շարժման մասնակիցների երթը Ֆրանսիայի հրապարակից Բաղրամյան պողոտայով հասել էր Հանրապետության նախագահի նստավայր և շրջափակել շենքը: Ոստիկանությունը պահանջում էր ցուցարարներից դադարեցնել գործողությունները:
ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը դիմելով ներկաներին հայտարարել էր, որ պետք է փակվեն նախագահական նստավայրի բոլոր մուտքերը՝ աշխատակիցների շենք մուտք գործելը խոչընդոտելու համար, «Հայաստան» խմբակցության պատգամավոր Գեղամ Մանուկյանն էլ հայտնել էր, որ շարժումն ամեն օր պատրաստվում է պետական տարբեր կառույցների շենքեր շրջափակել։
Նախագահական նստավայրի մոտ ոստիկանական մեծաթիվ ուժեր էին տեղակայված, իրավիճակը լարվեց, ցուցարարների և ոստիկանության աշխատակիցների միջև եղավ բախում, հրմշտոց սկսվեց: Ոստիկանական լրացուցիչ ուժեր բերվեցին նախագահական նստավայրի մոտ:
Բարձրանալով ՀՀ ոստիկանության՝ ծառայության մեջ գտնվող մեքենաներից մեկի վրա, Իշխան Սաղաթելյանը բարձրախոսով հանդարտության կոչ էր անում ցույցի մասնակիցներին: Քիչ առաջ «Դիմադրության» շարժման անդամները բացեցին Հայաստանի նախագահական նստավայրի, ինչպես անվտանգության խորհրդի շենքի մուտքերը:
Իշխան Սաղաթելյանը ելույթ ունեցավ, որի ընթացքում նշեց, որ նախագահական նստավայրը և անվտանգության խորհրդի շենքերի մուտքերը փակելու իրենց գործողությունների արդյունքում նախագահի աշխատակազմի, ինչպես նաև անվտանգության խորհրդի աշխատակիցները չեն կարողացել ներս մտնել:
Սաղաթելյանը հավելեց, որ այլևս անիմաստ է շենքերը շրջափակման մեջ պահելը, քանի որ երկու շենքում էլ մարդ չկա: «Ես կոչ եմ անում մեր մյուս հայրենակիցներին, որոնք այս պահին գտնվում են անվտանգության խորհրդի շենքի դիմաց և նախագահականի մյուս մուտքերի մոտ, դադարեցնել շրջափակումը, միանալ մեզ, որպեսզի երթով շարունակենք անհնազանդության այլ ակցիաները»,- ասաց Սաղաթելյանը:
Նա հավելեց, որ պետք է նույն եղանակով շարունակել, ճնշումն ավելացնել, ավելացնել անհնազանդության, բողոքի ակցիաների ծավալն ու քանակը: Նրա խոսքով՝ սա է իրենց նպատակին հասնելու ճանապարհային քարտեզը և հաղթանակի հասնելու բանաձևը: