Եվրոպական խորհրդարանը եւ եվրոպական բոլոր կառույցները միավորված են, միասնական են: Այս մասին, այսօր՝ փետրվարի 24-ին, լրագրողների հետ զրույցում նշեց Հայաստանում ԵՄ պատվիրակության ղեկավար, ԵՄ դեսպան Անդրեա Վիկտորինը:
«Մենք կանգնած ենք Ուկրաինայի կողքին եւ հայտարարությունները, որոնք արվեցին նախագահ Շառլ Միշելի եւ Ֆոնդերլայնի կողմից, շատ հստակ էին, որոնք դատապարտում էին Ուկրաինայի հանդեպ ագրեսիան:
Եվրախորհդրարանը եւ եվրոպական ինստիտուտները միասնաբար են աշխատում, ձեռք ձեռքի տված եւ մեր խորհրդակցությունների ժամանակ դա նույնպես ընդգծվեց: Մենք աշխատում ենք CEPA-ի (Համապարփակ և ընդլայնված գործընկերության համաձայնագիր-խմբ) բոլոր դրույթներ, բոլոր կետերի շուրջ եւ ԱԺ-ի, եւ ՀԿ-ների, եր կառավարության, եւ ներգրավված բոլոր կողմերի հետ»,-ասաց նա:
Դիտարկմանը, թե տպավորություն է որ Արեւմուտքը մենակ է թողել Ուկրաինային, ԵՄ դեսպանն րձագանքեց. «Կարդացեք երկու նախագահների հայտարարությունները եւ կտեսնեք ԵՄ-ի դիրքորոշումը, որը հստակ է»:
հարցին, թե պատժամիջոցները կկանգնեցնե՞ն Ռուսաստանին, որի զորքերն արդեն, ըստ որոշ լուրերի, խորացել են Ուկրաինայի տարածքում, նա պատասխանեց. «Ինչպես արդեն Մարինա Կալյուրանդը (ՀՀ-ԵՄ խորհրդարանական գործընկերության կոմիտեի համանախագահ-խմբ) նշեց, մենք վստահում եւ հավատում ենք, որ դիվանագիտության միջոցով հնարավոր կլինի հասնել արդյունքի: Սա մեծ աղետ է աշխարհի եւ Ուկրաինայի համար»:
Նշենք, որ Ռուսաստանի նախագահ Վլադիմիր Պուտինը առավոտյան ժամը 05.50-ին ռուսաստանցիներին ուղղված իր ուղերձում հայտարարել է, որ Դոնբասում հատուկ ռազմական գործողության մասին որոշում է կայացրել:
