Փետրվարի 23-ին ԱԺ «Հայաստան» եւ «Պատիվ ունեմ» խմբակցությունների պատգամավորներ Աննա Գրիգորյանը, Արթուր Խաչատրյանը, Արթուր Ղազինյանը եւ Հայկ Մամիջանյանը համատեղ մամուլի ասուլիսում ամփոփել են «Եվրանեսթ» խորհրդարանական վեհաժողովի լիագումար նիստերի արդյունքները:
Անդրադառնալով Հայաստան ժամանած Ադրբեջանի պատվիրակության մասին հարցին` Արթուր Ղազինյանն ասել է, որ 2012թ. ադրբեջանցիները բոյկոտում էին «Եվրանեսթ» ԽՎ-ի շրջանակում Հայաստան այցելությունները: Սակայն այս անգամ եկել էին Հայաստան եւ իրենց բավականին ազատ էին զգում: Նրա կարծիքով` հաշվի առնելով պատերազմից հետո ստեղծված իրավիճակը եւ տիրող բարոյահոգեբանական մթնոլորտը` վերջիններս չպետք է գային Հայաստան:
Ըստ պատգամավորի` եթե կար «Եվրանեսթ»-ի բնականոն գործունեությունն ապահովելու միջազգային պարտավորություն, ապա դա կարելի էր կազմակերպել օնլայն ձեւաչափով` փաստացի նրանց չտալով Հայաստան այցելելու հնարավորություն:
Բանախոսների ներկայացմամբ` ընդդիմությունը միասնական հանդես եկավ այդ հարթակում` ներկայացնելով ՀՀ ազգային եւ պետական շահը` ուղիղ ուղերձներ հղելով ադրբեջանական հանրությանը եւ իշխող քաղաքական էլիտային` Արցախի, ինչպես նաեւ ՀՀ սահմանին տիրող իրավիճակի վերաբերյալ:
Արթուր Ղազինյանը նշել է, որ «Եվրանեսթ» խորհրդարանական վեհաժողովի նիստերի ժամանակ արձանագրվել է, որ Արցախի հարցը կարգավորված չէ, որ Արցախը եղել է, կա, մնալու է հայկական եւ երբեք չի լինելու Ադրբեջանի կազմում:
ԵԽ պատգամավորները եւս հաստատել են, որ չեն ճանաչում պատերազմի արդյունքները, եւ Արցախի հարցը կարգավորված չէ:
