ՀՀ վարչապետի տիկին Աննա Հակոբյանը մայիսի 25-ին Դավոսում մասնակցել է «Կին քաղաքական առաջնորդներ» (Women Political Leaders - WPL) ամենամյա միջոցառմանը։ Այն ազգային մակարդակով կին քաղաքական գործիչների համաշխարհային անկախ, բարեգործական հիմնադրամ է՝ հիմնված Ռեյկյավիկում 2013թ.-ին Եվրոպական խորհրդարանի նախկին փոխնախագահ (2009-2011), Եվրոպական խորհրդարանի անդամ (2004-2014) և Կանանց քաղաքական առաջնորդների գլոբալ ֆորումի նախագահ Սիլվանա Կոխ-Մեհրինի կողմից:
Ինչպես տեղեկացրին ՀՀ վարչապետի տիկին Աննա Հակոբյանի գրասենյակից, հիմնադրամի առաքելությունն է մեծացնել ինչպես կանանց թիվը, այնպես էլ իրենց ազդեցությունը քաղաքական ղեկավարող պաշտոններում և առհասարակ երկրների քաղաքական կյանքում: WPL-ն առաջարկում է կին քաղաքական գործիչներին հաղորդակցության և անընդհատ կապի համաշխարհային հարթակ:
«Ռեյկյավիկ համայնքի Դավոսի նախաճաշի ընթացքում հրավիրվածները ծանոթացան «Ռեյկյավիկն Առաջնորդների ինդեքսի համար» հետազոտության արդյունքներին: Հետազոտության մեջ ամփոփված են հասարակության մոտեցումներն այն մասին, թե որքանով են կանայք ու տղամարդիկ հավասարապես համապատասխանում առաջնորդելուն»,- ասվում է հաղորդագրության մեջ:
