Ազգային ժողովի նախագահ Ալեն Սիմոնյանը մանրամասներ հաղորդեց Արցախից ժամանած պատվիրակության հետ հանդիպումից: Հանդիպումից հետո լրագրողների հետ ճեպազրույցում Ալեն Սիմոնյանը կարծիք հայտնեց, որ Արցախի պատվիրակությունը բավարարված էր հանդիպման արդյունքից:
«Այդ շփումները առաջին անգամ չեն: Ճիշտ է, գործընկերներ կան, որոնց հետ նման ձևաչափով առաջին անգամ է շփումը, բայց շփումները մշտապես կան: Քննարկեցինք Մոսկվա կատարված իմ այցը, ներկայացրեցի հանդիպումները, քննարկումները: Պատասխանեցի հարցերին, որոնք հետաքրքրում էին, ինչպես նաև լսեցի մեր գործընկերներին և կարող եմ ասել, որ զուտ ձևաչափի առումով ինչ-որ նոր բան է, բայց որպես այդպիսին այդ շփումները գրեթե ամեն շաբաթ կան»,- ասաց Սիմոնյանը:
Հայաստանի իշխանությունները մշտապես առաջարկել են, որ Արցախը պետք է ներգրավված լինի և ներգրավված է բոլոր քննարկումների ու հարցերի մեջ: Արցախի պատվիրակության հետ հանդիպումից հետո լրագրողների հետ ճեպազրույցում այս մասին ասաց Ազգային ժողովի նախագահ Ալեն Սիմոնյանը;
«Մենք Արցախին առաջարկում ենք այն, ինչ-որ առաջարկել ենք մշտապես՝ Արցախը ինքնուրույն պետք է ներգրավված լինի և ներգրավված է բոլոր քննարկումների ու հարցերի մեջ: Հայաստանի Հանրապետությունը միևնույն ժամանակ պետք է մաքսիմալ ներգրավված լինի այդ խոսակցությունների մեջ»,- ասաց Սիմոնյանը:
Արձագանքելով Ադրբեջանի նախագահ Իլհամ Ալիևի այն հայտարարությանը, թե երբ կցանկանան և ինչպես կցանկանան կբանակցեն Արցախի հետ՝ Ալեն Սիմոնյանը նշեց, որ մինչ օրս եղել են շատ հարցեր, որ Ադրբեջանը քննարկել է և բանակցել է Արցախի իշխանությունների հետ:
«Միևնույն ժամանակ, Ադրբեջանը գտնվում է մշտական կապի մեջ Արցախի օրինական իշխանությունների հետ շատ հարցերում: Նույնիսկ լինում են դեպքեր, որ Արցախի իշխանությունները ինֆորմացիոն առումով ավելի շատ են տեղեկացված լինում, քան մենք: Բնական է, որ հարևան երկրի ղեկավարությունը պետք է այլ ձևակերպումներ տա՝ Ստեփանակերտի տեղը ադրբեջանական անվանում ասի և այլն, և այլն: Ես խնդրում եմ դիտարկել դա այդ տրամաբանության մեջ: Միևնույն ժամանակ, հիշենք բանակցային գործընթացը չի ավարտվել, որևէ փաստաթուղթ, որի վրա կարող ենք հղում անել, գոյություն չունի: Բնական է, ամեն մի կողմ իր տեսլականը և իր պատկերացումը ներկայացնում է: »,- եզրափակեց Սիմոնյանը:
Արցախի Հանրապետության նախագահ Արայիկ Հարությունյանի գլխավորած պատվիրակությունը այս օրերին գտնվում է Հայաստանում և հանդիպումներ է ունենում ՀՀ բարձրագույն քաղաքական ղեկավարության հետ։ Հանդիպումների ընթացքում քննարկվում են ղարաբաղա-ադրբեջանական հակամարտությանը, տարածաշրջանային վերջին զարգացումներին և ներհայկական կապերին վերաբերող հարցեր։
