Մայիս ամսվա ընթացքում ունենք Հայաստանում գրանցված վճարվող աշխատավարձերի պատմական նոր ռեկորդ և մայիս ամսին արձանագրվել է բացարձակ ռեկորդային՝ 673 224 վճարովի աշխատատեղ: Այս մասին այսօր Կառավարության հերթական նիստին հայտարարեց ՀՀ վարչապետ Նիկոլ Փաշինյանը:
«2022 թվականի մայիսին, 2021-ի մայիսի համեմատ, մեր աշխատատեղերն ավելի են 38 273 -ով կամ 6 տոկով և 2019 թվականի մայիսի նկատմամբ ավելի են 72 359-ով կամ 12 տոկոսով, իսկ 2018 թվականի մայիսի նկատմամբ՝ 125 235 աշխատատեղով»,- ասաց նա:
Վարչապետը հաջորդ ռեկորդային ցուցանիշը համարեց աշխատավարձի ֆոնդը, այսինքն՝ բոլոր աշատողներին միասին վճարած աշխատավարձը: «Այդ ֆոնդը կազմել է 160 միլիարդ 56 միլիոն դրամ, որը նախորդ տարվա մայիսի նկատմամբ ավելի է 4 միլիարդ 531 միլիոն դրամով, իսկ 2018 թվականի մայիսի նկատմամբ ավելի է 63 միլիարդ 369 միլիոն դրամով, կամ 65 տոկոսով»,- ասաց նա:
Նիկոլ Փաշինյանը հայտնեց, որ եկամտահարկի ընդհանուր գումարը մայիսին կազմել է 32 միլիարդ 741 միլիոն դրամ, որը 2021 թվականի մայիսի նկատմամբ ավելի էր 3 միլիարդ 811 միլիոն դրամով, իսկ 2018 թվականի մայիսի նկատմամբ ավելի է 8 միլիարդ 578 միլիոն դրամով: Նա նշեց, որ վերադարձված գումարները չեն հաշվարկվում: Նա նաև տեղեկացրեց, որ 2021 թվականին 32 միլիարդ դրամ եկամտահարկ են վերադարձրել և շուրջ 140 միլիարդ դրամի ավելացված արժեքի հարկ:
«Միջին ամսական աշխատավարձը 2022 թվականի մայիսին կազմել է 237 հազար 45 դրամ, որը 2021 թվականից ավելի է 25 592 դրամով կամ 12 տոկսով, և դա կարևոր ցուցանիշ է՝ հաշվի առնելով գնաճը, 2019 թվականի նկատմամբ ավելի է 27 տոկոսով, 2018 թվականի համեմատ՝ 34,7 տոկոսով»,- ասաց նա: