ՀՀ ազգային ժողովն առաջին ընթերցմամբ քննարկում է կառավարության ներկայացրած օրենքի նախագիծը, որով առաջարկում է արտահանման լիցենզիոն տուրք կիրառել պղնձի և մոլիբդենի խտանյութերի և որոշ հարակից ապրանքների նկատմամբ: «Պետական տուրքի մասին» Հայաստանի Հանրապետության օրենքում փոփոխություն եւ լրացում կատարելու մասին օրենքի նախագիծն ԱԺ արտահերթ նիստում ներկայացրեց ՀՀ էկոնոմիկայի նախարարի պաշտոնակատար Վահան Քերոբյանը:
«Առաջարկվում է արտահանման լիցենզիոն տուրք սահմանել պղնձի խտանյութի և մոլիբդենի խտանյութի և հարակից որոշ արտաքին տնտեսական գործունեության ապրանքային անվանացանկի դասակարգիչների նկատմամբ՝ սահմանելով այս պահին գործող շուկայական գների մոտ 15 տոկոսի չափով, բայց ֆիքսված արտահանման լիցենզիոն տուրք»,-ասաց Քերոբյանը:
Նրա խոսքով՝ ռոյալթիների այսօրվա գործող համակարգը բավարար չափով չի պաշտպանում և չի ապահովում ընդերքից ստացված եկամուտների հավասարաչափ բաշխումը ՀՀ քաղաքացիների և տնտեսավարողների միջև: Քերոբյանի խոսքով՝ շուկայում ստեղծված գերբարենպաստ շուկայական կոնյուկտուրան թույլ է տալիս, որ ՀՀ-ն կիրառի այսպիսի տուրք՝ միաժամանակ բյուջեի համար ապահովելով շատ անհրաժեշտ նոր մուտքեր, մյուս կողմից տնտեսավարողների համար պահպանելով բավականին լավ աշխատանքային միջավայր:
Քերոբյանը հիշեցրեց, որ պղնձի գները անցյալ տարվա 6000 համեմատ այժմ 9200-9300 դոլարի սահմաններում են, իսկ մոլիբենդի գները՝ անցյալ տարվա միջին 24 հազարի փոխարեն այժմ 41 հազար դոլարի սահմաններում: «Այսինքն՝ այս ավելացումն, ըստ էության, թույլ է տալիս, որ ավելացված մասի մի մասը մենք վերցնենք»,-ասաց նա՝ հավելելով, որ մոտ ապագայում նախաձեռնելու են ռոյալթիների համակարգի կտրուկ վերանայում:
Հովիկ Աղազարյանը նկատեց՝ հիմա միջազգային շուկայում պղնձի գները բարձր են, հետաքրքրվեց՝ եթե կտրուկ ընկնեն, ի՞նչ տեղի կունենա: Նախարար պաշտոնակատարն արձագանքեց՝ պղնձի գները բարձր են այս տարվա սկզբից: «Ըստ էության, տնտեսավարողներն այս բարենպաստ միջավայրը վայելում են արդեն բավականին երկար ժամանակ: Եվ մեր ակնկալմամբ՝ մոտ ապագայում չի նախատեսվում գների անկում, եթե նույնիսկ անկում էլ լինի, միևնույն է կուտակված գերշահույթն այնքան է, որ իրենք ընդհանուր առմամբ 6-ամսյա այդ ժամկետում կունենան բավարար չափով եկամտաբերություն»,-ասաց նա:
