Ղազախստանի մայրաքաղաք Ալմաթիում մեկնարկել է ԵԱՏՄ միջկառավարական խորհրդի նեղ կազմով նիստը: Այդ մասին Ալմաթիից հայտնում է «Լուրերի» թղթակիցը: Խորհրդի նիստին մասնակցում են ԵԱՏՄ անդամ և դիտորդ երկրների կառավարությունների ղեկավարները, այդ թվում՝ ՀՀ վարչապետ Նիկոլ Փաշինյանը: Ավելի ուշ տեղի կունենա ԵԱՏՄ միջկառավարական խորհրդի ընդլայնված կազմով նիստը:
Մի շարք լրատվականներ, անդրադառնալով վարչապետ Նիկոլ Փաշինյանի՝ Ղազախստանի Հանրապետություն կատարած աշխատանքային այցին, գրում են, թե հայկական կողմը Ալմաթիում որպես ժամանակավոր կացարան ընտրել է թուրքական «Rixos Almaty» հյուրանոցը։
«Տեղեկատվության ստուգման կենտրոնի» հարցմանն ի պատասխան Վարչապետի աշխատակազմի Տեղեկատվության և հասարակայնության հետ կապերի վարչությունից հայտնեցին, որ համաձայն արարողակարգի՝ ընդունող երկիրն է որոշում (այս դեպքում Ղազախստանը), թե որ միջոցառումը որտեղ և ինչպես անցկացնել։
«Բոլոր երկրների պատվիրակությունների անդամներին Ղազախստանն ընդունել է այդ հյուրանոցում, որտեղ և ացկացվելու է Եվրասիական միջկառավարական խորհրդի նիստը։ Ինչ վերաբերում է վճարներին՝ ՀՀ պատվիրակության հիմնական կազմի հյուրանոցային վճարը հյուրընկալող կողմի հաշվին է։ »-պարզաբանեցին կառավարությունից։
Հավելենք, որ ԵԱՏՄ-ի և ՀԱՊԿ-ի շրջանակներում անցկացվող միջոցառումներին Ղազախստանը հյուրընկալվող պատվիրակություններին ընդունում է հիմնականում տվյալ ցանցին պատկանող հյուրանոցում։
