ՀՀ վարչապետի պաշտոնակատար Նիկոլ Փաշինյանն այսօր Կառավարության նիստում անդրադարձավ բյուջետային հարցերին: Նա պետական եկամուտների կոմիտեի նախագահ Էդվարդ Հովհաննիսյանից խնդրեց ներկայացնել 2021 թվականի բյուջեի եկամուտների հավաքագրման տվյալները՝ նախորդ տարիների հետ համեմատելով:
ՊԵԿ նախագահը տեղեկացրեց, որ 2021 թվականի առաջին 5 ամիսների ընթացքում հավաքագրված հարկային եկամուտները կազմել են 618.4 մլրդ դրամ, իսկ հարկ վճարողներին եւ ֆիզիկական անձանց տարբեր հարկատեսակների գծով վերադարձված գումարները՝ 68.6 մլրդ դրամ: Նրա խոսքով՝ նշված ցուցանիշները դրական տարբերություն ունեն ե՛ւ 2020 ե՛ւ 2019 թվականի համեմատելի տվյալների համեմատ: 618.4 մլրդ հավաքագրված եկամուտները 47.2 մլրդ-ով ավելի են 2019 թվականի համադրելի տվյալներից եւ 34.8 մլրդ դրամով ավելի են 2020 թվականի համադրելի տվյալներից:
«Վերադարձված գումարների մասով նշեմ, որ 2021 թվականի ընթացքում վերադարձված 64.6 մլրդ դրամը մոտ 25 մլրդ դրամով ավելի է 2019 թվականի ընթացքում վերադարձված գումարներից եւ 15 մլրդ դրամի չափով ավելի է 2020-ի ընթացքում վերադարձված գումարներից»,- մանրամասնեց ՊԵԿ նախագահը:
Նիկոլ Փաշինյանը հիշեցրեց, որ 2019 թվականի ամբողջ տարվա արդյունքներով հարկային եկամուտների մոտավորապես 40 տոկոս աճ էր արձանագրվել. «Հիմա 2019-ի համեմատությամբ ունենք 8.3 տոկոս աճ»:
«Ուզում եմ նաեւ ընդգծել, որ այս ամեն ինչը տեղի են ունենում գումարների վերադարձի ֆոնին: 2021-ի 5 ամիսներին վերադարձված 68.6 մլրդ դրամը՝ ակցիզային հարկի, ավելացված արժեքի եւ հիփոթեքային վարկով եկամտահարկի վերադարձին է վերաբերում: Սա նույնպես կարեւոր ցուցանիշ է, որովհետեւ մենք հարկային հավաքագրումների այսպիսի առաջանցիկ աճ ապահովում ենք՝ բիզնեսին եւ քաղաքացիներին վերադարձնելիք գումարն ամբողջությամբ վերադարձնելով»,- ասաց Փաշինյանը:
Նրա խոսքով՝ կարեւոր է արձանագրել, որ Կառավարությունը շարունակում է բիզնեսի եւ հանրության նկատմամբ պարտքերը զրոյացնելու քաղաքականությունը:
Բացի այդ Նիկոլ Փաշինյանն նշեց, որ նախորդ օրը քննարկման ժամանակ ՊԵԿ նախագահն ասել է, որ երբ բիզնեսը ԱԱՀ-ի վերադարձի հարցով դիմում է գրում ՊԵԿ-ին՝ 3-4 օրվա ընթացքում գումարը հետ է վերադարձվում: Նա Էդվարդ Հովհաննիսյանին ասաց, որպեսզի հանրությանը ներկայացնի դա:
Արձագանքելով ՊԵԿ նախագահն ասաց. «ԱԱՀ-ի, ակցիզային հարկի եւ եկամտահարկի գծով վերադարձվող փոխհատուցվող գումարների դիմումները հիմնականում ամսի 20-ից հետո այսինքն հաշվետվությունները ներկայացնելուց հետո ստացվում է ՊԵԿ-ում եւ ձեռնարկվում է դրանք ուսումնասիրելու, իսկ որոշ դեպքերում պարզեցված եղանակով՝ վերադարձվում են: Այսինքն ձեռնարկվում է այդ գործընթացը եւ հաշված օրերի ընթացքում հարկ վճարողի ունեցած գերավճարները փոխանցվում են նրա բանկային հաշվեհամարներին՝ ֆինանսների նախարարության կողմից՝ ՊԵԿ-ի կատարած տվյալների ուսումնասիրության հիման վրա»:
