Սիրիայում և Թուրքիայում երկրաշարժերի զոհերի թիվն ընդհանուր առմամբ գերազանցել է 500-ը: Սիրիայի առողջապահության նախարարությունը հայտնել է հարյուրավոր զոհերի ու վիրավորների մասին:
«Հալեպ, Լաթաքիա, Համա և Տարտուս նահանգներում զոհվել է 237, վիրավորվել՝ 639 մարդ», - հայտնել է գերատեսչությունը։
Ավելի վաղ գործակալությունը հայտնել էր 111 զոհի և 516 վիրավորի մասին։ Թուրքիայում, ըստ փոխնախագահ Ֆուաթ Օքթայի, զոհվել է 284 մարդ, ևս 2383-ը վիրավորվել են։ Քահրամանմարաշ նահանգում զոհվել է 70 մարդ, այնտեղ ավերվել է մոտ 300 շինություն։ Վիրավորների մեծ մասը գտնվում է Շանլիուրֆա նահանգում՝ մոտ 600։
7,4 մագնիտուդով երկրաշարժը տեղի է ունեցել Քահրամանմարաշ նահանգում առավոտյան ժամը 04:17-ին։ Երկրաշարժի էպիկենտրոնը գտնվել է Գազիանթեփից 37 կմ հեռավորության վրա, օջախը՝ տասը կիլոմետր խորության վրա։
Տարբեր քաղաքներում հարյուրավոր շենքեր են փլուզվել, իսկ Հաթայ նահանգում գազատարի վրա պայթյուն է որոտացել։ Երկրաշարժին հաջորդել են երեք տասնյակ հետցնցումներ, ամենահզորը՝ 6,6 մագնիտուդով։ Սիրիայում մեծ վնաս է հասցվել Հալեպի պատմական կենտրոնի: Ցնցումները զգացվել են նաև Լիբանանի մայրաքաղաք Բեյրութում և Իրաքում։
Թուրքիայի վեց շրջաններում ուժգին երկրաշարժ է տեղի ունեցել, ցնցումներ են գրանցվել նաև հարևան Սիրիայում, կան ավերածություններ, զոհեր ու վիրավորներ 2 երկրում էլ: