Երեկ ՀՀ ՊՆ Պաշտպանական ազգային հետազոտական համալսարանում մեկնարկեց Պաշտպանական ներքին աուդիտի և ռիսկի կառավարման ծրագիրը: Վերապատրաստման այս ծրագրում կներգրավվեն Պաշտպանության նախարարության և Ազգային ժողովի պաշտպանության և անվտանգության հարցերի մշտական հանձնաժողովի 30 աշխատակիցներ, որոնք կվերապատրաստվեն ներքին աուդիտի միջազգային չափանիշներին համապատասխան և կկարողանան կիրառել իրենց գիտելիքները՝ ի նպաստ վերահսկողության, թափանցիկության և հաշվետվողականության չափանիշների խթանման:
Բրիտանական դեսպանատան Գործերի ժամանակավոր հավատարմատար Փոլ Մորիսն իր բացման խոսքում ասաց. «Հանրային ոլորտի աշխատակիցները պետք է ձգտեն պահպանել ազնվության ամենաբարձր մակարդակ և բարձր պահեն հասարակության կողմից իրենց նկատմամբ ցուցաբերված վստահությունը՝ ապահովելով ծախսերի մասին հաշվետվողականություն։ Վստահություն ձևավորելու համար հարկ է ներդնել ամուր համակարգեր, ինչպիսին է ներքին աուդիտի համակարգը և ապահովել դրանց արդիականությունը: Ուրախ եմ, որ Միացյալ Թագավորության կառավարության աջակցությամբ իրականացվող դասընթացների այս շարքը ձեզ հնարավորություն կտա ձեռք բերել այդ նպատակի իրականացմանն ուղղված հմտություններ»:
