րեր առաջ ռուսական РБК-ն, հղում անելով իր աղբյուրներին գրել էր, որ Եվրասիական տնտեսական միությունը քննարկում է ադրբեջանական պատվիրակության հնարավոր մասնակցությունը ԵԱՏՄ միջկառավարական խորհրդի նիստին, որը տեղի կունենա ապրիլի 29-30 Կազանում: Ըստ կայքի՝ Բաքուն կարող է Կազան ուղարկել իր ներկայացուցիչներին, եթե Երևանը տա իր համաձայնությունը։
Եվ որպեսզի դա տեղի ունենա, РБК-ի փոխանցմամբ, Հայաստանի կողմից պայման է դրվում հայ ռազմագերիների վերադարձի հարցը։
Այսօր Ազգային ժողովում լրագրողների հետ զրույցում ՀՀ փոխվարչապետ Մհեր Գրիգորյանն ասաց, որ այդ հարցի կապակցությամբ մոտ ժամանակներս կներկայացնեն իրենց դիրքորոշումը:
Լրագրողի հարցին՝ գերիների, տրանսպորտային ապաշրջափակման հարցը բարձրացրե՞լ է Երևանը՝ որպես Ադրբեջանի մասնակցությանը համաձայնություն տալու նախապայման, փոխվարչապետը պատասխանեց, որ քննարկվում են բոլոր բաղադրիչները: Ըստ նրա՝ համաձայնեցնելու խնդիրը ունի ֆորմալ գործընթաց, որը մոտ օրերս կավարտվի:
«Այս գործընթացը ենթադրում է համաձայնեցնել այլ երկրի՝ նիստին մասնակցելու հարցը, որը որևէ բովանդակային գործընթաց չի ենթադրում, ուղղակի գալու է ամսաթիվը, և մենք ասենք՝ այո կամ ոչ: Ինչ վերաբերում է նախապայմաններ դնել կամ չդնելուն, նախապայմաններ դնելու համար պետք է հայտնեք՝ ո՞ւմ առջև դնել: Ես կարծում եմ՝ Մոսկվայի հետ, այդ թվում՝ գերիների հարցը, քննարկվում է կոնստրուկտիվ ձևաչափով, և, հուսով եմ՝ լուծումներ կլինեն»,- ասաց Գրիգորյանը:
Լրագրողը փորձեց ճշտել՝ Կառավարությունը դա ևս մեկ առի՞թ է համարում գերիների հարցը բարձրացնելու համար: Մհեր Գրիգորյանը պատասխանեց, որ դա «մեր ամենակարևոր հարցն է, և մեր կյանքում ցանկացած իրադարձություն առիթ է, որպեսզի այդ հարցը բարձրացնենք և քննարկենք»:
