Թուրքական ոչ իշխանամետ լրատվամիջոցներից մի քանիսը ուշադրություն են հրավիրել այն հանգամանքի վրա, որ Ստամբուլի բյուզանդական շրջանի Սուրբ Սոֆիայի տաճարը թանգարանից մզկիթի փոխելու որոշումից առաջ էլ Թուրքիայի արևելքում բազմաթիվ եկեղեցիներ են մզկիթի վերածվել:

Դրանցից մեկը 1873-1893 թթ․ Այնթափում հայ հայտնի ճարտարապետ Սարգիս Պալյանի նախագծմամբ և Սարգիս Թաշչյանի կողմից կառուցված հայկական Սուրբ Աստվածածին  եկեղեցին է: Հայոց ցեղասպանությունից հետո՝ 1920 թ․, այն որպես բանտ է օգտագործվել։

1980 թ․ Գազիանթեփեի նախկին նահանգապետերից Աբդուլքադիր Աքսուի որոշմամբ, որն ավելի ուշ եղել է Թուրքիայի ներքին գործերի նախարարը, հայկական եկեղեցու վրա փոփոխություններ են կատարվել, և այն վերածվել է մզկիթի։