«Այս շտամը ծանր ազդեցություն է թողնում նաև հղիների մոտ և տեղեկացնեմ, որ այս պահին կա 122 հղի կին, որոնցից 53-ի մոտ առկա է թոքաբորբ և թթվածնային կախյալ են»,-կառավարության այսօրվա նիստում հայտնեց առողջապահության նախարար Անահիտ Ավանեսյանը՝ ներկայացնելով երկրում տիրող համաճարակային իրավիկճակը:
Նախարարը հայտնեց, որ ՀՀ-ում մոբիլիզացված է 27 բժշկական կենտրոն, որոնք սպասարկում են կովիդով հիվանդներին:
«Ընդհանուր առմամբ բոլոր 3050 մահճակալները գրեթե անընդհատ պրակտիկորեն զբաղված են» ,-ասաց նա:
Նրա խոսքով՝ 1088 քաղաքացի գտնվում է ծանր վիճակում, որից ծայրահեղ ծանր վիճակում են 307-ը և 152 քաղաքացի միացած է թոքային օդափոխության սարքերին:
Ավանսյանը նշեց, որ նոր շտամը մտահոգիչ է թե՛ ծանրության, թե՛ վարակելիության, թե՛ տարիքային խոցելիության առումով:
«Դրական ակտիվ դեպքերի 30433 քաղաքացիների շրջանում պատվաստված քաղաքացիները ընդամենը 1702-ն են, հոսպիտալացված 3100 քաղաքացիների շրջանում պատվաստվածների թիվը 96-ն է և վերակենդանացման բաժանմունքում 1500 քաղաքացիներից 5 հոգի են պատվաստված»,-պատվաստված քաղաքացիների շրջանում վարակի տարածման ցուցանիշները ներկայացրեց առողջապահության նախարարը, արձանագրելով՝ ծանր վիճակում գտնվող վարակակիրների միայն 0.5%-ն է պատվաստված:
Անահիտ Ավանեսյանը հայտնեց, որ այն երկրներում, որտեղ պատվաստվածների թիվը 70-%-ից ավել է, այնտեղ մահվան և ծանր դեպքերի թիվը շատ փոքր է:
Փաշինյանը նաև տեղեկացրեց, որ կեղծ պատվաստման դեպքերով մեկ տասնյակից ավել բուժաշխատողներ են ներգրավված և 6 բժիշկ կալանավորված է: