Այսօր վաղ առավոտից համացանցում մեծ իրարանցում է սկսվել Ուկրաինայի Գերագույն ռադայի պաշտոնական էջում տեղադրված ապատեղեկատվության պատճառով: Բանն այն է, որ Ուկրաինայի Գերագույն Ռադայի «Թվիթեր»-ի պաշտոնական էջը հրապարակել է Արցախի Հանրապետության Փառուխ գյուղ ադրբեջանական զորքերի ներխուժման հետ կապված գրառում: Գերագույն Ռադան նախ հրապարակել է «Новини Збройних сил» տելեգրամյան ալիքի չճշտված տեղեկությունը, թե, իբր, «Ադրբեջանի զինուժը հարձակման է անցել Ղարաբաղում` օգտվելով Ռուսաստանի կողմից զինվորներին Ուկրաինա տեղափոխելու հանգամանքից», այնուհետև վերաշարադրել այդ հրապարակումը: Բացի այդ, Գերագույն Ռադան օգտագործել է էմոջի` դրանով իսկ, կարծես, ողջունելով Ադրբեջանի կողմից Արցախում հայերի էթնիկ զտումները: Ավելի ուշ, Գերագույն Ռադան այդ գրառումը հեռացրել է:
Այս ակնհայտ ապատեղեկատվությունը հրապարակվել է՝ չնայած այն հանգամանքին, որ կեղծ տեղեկատվությունը բազմիցս հերքվել է և Ուկրաինայում մղվող ռազմական գործողությունների ընթացքում Հայաստանը բացահայտ չեզոք դիրքորոշում է որդեգրել: Ի դեպ, ուկրաինական պետական գերատեսչության այս թվիթը բազմաթիվ ուկրաինացիների ուրախությունն է հարուցել:
Նշենք, որ հայկական դիվանագիտական կողմի ջանքերով և մեծ աղմուկի արդյունքում թվիթն արդեն հեռացվել է:
