Ստեփանակերտի քաղաքապետ Դավիթ Սարգսյանը շնորհավորական ուղերձ է հղել Հունիսի 1-ի՝ Երեխաների իրավունքների պաշտպանության օրվա առթիվ։
Ուղերձում ասվում է․
«Այսօր նշում ենք մեր տոնացույցի ամենալուսավոր օրերից մեկը՝ Երեխաների իրավունքների պաշտպանության օրը: Այն ավագներիս պարտավորեցնում է իրապես մտածել փոքրիկների իրավունքների ու ազատությունների մասին, առավել պատասխանատու լինել մեր հետնորդների ճիշտ դաստիարակության և կրթության ապահովման գործում: Երեխաները ոչ թե լսելով են սովորում, այլ՝ տեսնելով: Ուստի նրանց աշխարհընկալումը ձևավորվում է՝ հիմքում ունենալով նաև մեր օրինակը: Մեր երեխաներն են մեզ ստիպում ավելի բարի ու հանդուրժող լինել: Մենք էլ պետք է անենք ամեն հնարավորը մեր մանուկներին խաղաղ կյանք պարգևելու համար: «Ամեն լավը՝ երեխաներին» կարգախոսը պետք է դառնա համազգային ուղենիշ: Այդ դեպքում կունենանք երաշխավորված ապագա: Սիրելի՛ երեխաներ, անչափելի է մեր սերը ձեր հանդեպ: Ձեզ երջանիկ ու առողջ տեսնելու համար պատրաստ ենք սարեր շուռ տալ: Անկաշկանդ ու ազնիվ մեծացե՛ք: Դժվարությունների առաջ չծնկե՛ք: Նպատակասլացություն և անկոտրում կամք եմ ձեզ մաղթում... Մենք հավատում ենք Արցախի պայծառ ապագային, իսկ այդ ապագան կերտողը հենց դուք եք լինելու: Շնորհավո՜ր»: