ՍՏԵՓԱՆԱԿԵՐՏ 20 փետրվարի, ԱՐՑԱԽՊՐԵՍ։ Այս մասին թելեգրամի իր ալիքում գրառում է կատարել ԱՀ պետական նախարար Արտակ Բեգլարյանը:
Գրառման հայերեն թարգմանությունը ներկայացնում ենք ստորև.
«Քաղաքացիական բնակչության տարհանումը, զոհերի ու վիրավորների արձանագրումը և այլ զարգացումներ քիչ-քիչ հիշեցնում են 2020թ. ադրբեջանա-թուրքական ագրեսիայի հետևանքով առաջացած հումանիտար աղետն Արցախում: Որպես Ադրբեջանի հետ երկու պատերազմներում մեծածավալ տառապանքներ արձանագրած ու անձամբ տեսած մարդ՝ կուզեի նման մասշտաբի տառապանք չտեսնել աշխարհի ոչ մի կետում, այդ թվում՝ Դոնբասում: Ցավալի է, որ աշխարհաքաղաքական տարաձայնություններն ու նկրտումները հանգեցնում են մարդկային շարունակական տառապանքների:
Ես դեռևս հույս ունեմ, որ ողջախոհությունն ու մարդասիրությունը կհաղթեն այս իրավիճակում և հնարավոր կլինի խաղաղ լուծում գտնել թե՛ Դոնբասում և թե՛ Ռուսաստան-Արևմուտք հարաբերություններում՝ հաշվի առնելով բոլոր կողմերի հատկապես կենսական շահերը:
Ի դեպ, ադրբեջանա-ղարաբաղյան հակամարտությունն ավանդականորեն եղել է այն բացառիկ աշխարհաքաղաքական կետերից, որտեղ Ռուսաստանն ու Արևմուտքը համագործակցել են հակամարտության խաղաղ կարգավորման շուրջ: Թեև այդ համագործակցային ջանքերն արդյունք չեն տվել ադրբեջանական ագրեսիվ վարքի ու միջազգային կանխարգելիչ կոշտ արձագանքի բացակայության պատճառով, սակայն, կարծում եմ, Ղարաբաղի շուրջ համագործակցության երկարամյա դրական փորձը հնարավոր է կիրառել Դոնբասում և հասնել հակամարտության տևական կարգավորման»:
