Արցախի Հանրապետության նախագահ Արայիկ Հարությունյանի նախագահությամբ այսօր տեղի է ունեցել Արցախի կառավարության նիստ, որի ընթացքում նախագահն անդրադարձել է իր գլխավորած պատվիրակության՝ ՀՀ-ում ունեցած աշխատանքային քննարկումների արդյունքներին։
Արցախի Հանրապետության նախագահը ներկայացրել է հանդիպումների մանրամասները և Արցախի իշխանությունների մոտեցումներն Արցախի ապագայի վերաբերյալ:
Հարությունյանը կարևորել է Հայաստանի Հանրապետության հետ համակարգված աշխատանքը ինչպես ներքին խնդիրները հաղթահարելու, այնպես էլ արտաքին քաղաքական մարտահրավերներին դիմակայելու հարցում։
Արցախի Հանրապետության նախագահ Արայիկ Հարությունյանն այսօր նաև հանդիպել է Արցախի Ազգային ժողովի պատգամավորների հետ։
Ազգային ժողովին են ներկայացվել երևանյան հանդիպումների մանրամասները։
Նախագահ Հարությունյանը և պատվիրակության անդամները պատասխանել են պատգամավորների հարցերին, որոնք վերաբերում էին հիմնականում Հայաստանի ու Ադրբեջանի միջև ընթացող բանակցություններին և դրանց ազդեցությանը Արցախի վրա։
Պատասխանելով հարցերին՝ Արայիկ Հարությունյանը ևս մեկ անգամ վերահաստատել է, որ Արցախի իշխանությունները հավատարիմ են Արցախի ժողովրդի ինքնորոշման իրավունքի իրացման միջոցով Արցախի անկախության միջազգային ճանաչմանը հասնելու նպատակին։
