Պաշտոնական այցով Ֆրանսիայում գտնվող ԱՀ նախագահի խորհրդականներ Ազատուհի Սիմոնյանի ու Լուսինե Ղարախանյանի փարիզյան հերթական հանդիպման հասցեն հայկական վարժարաներն են` «Արցախպրես»-ի հետ զրույցում նշել է Ազատուհի Սիմոնյանը։
«143 տարի առաջ Կոստանդնուպոլսում հիմնադրված Փարիզի Դպրոցասեր վարժարանում քննարկել ենք համագործակցության լայն ձևաչափեր: Հայկական հաջորդ կրթօջախը, որտեղ եղանք, Իսի լե Մուլինոյի Համազգային-Թարգմանչաց վարժարանն է, որտեղ 3-10 տարեկան հայ երեխաները, մանկապարտեզից սկսած, ստանում են հայեցի դաստիարակություն: Վարժարաններին ներկայացրել ենք «Քույր դպրոց» ծրագրի հայեցակարգը, նպատակները և գործադրման եղանակները»,֊ մանրամասնել է նա և հավելել՝ քննարկվել են համատեղ ծրագրեր իրականացնելուն, դպրոցների աշակերտության և ուսուցչության միջև երկկողմ կապեր ստեղծելուն, ֆրանսահայ վարժարանների կառավարման և կրթական համակարգին առնչվող հարցեր։
Նախագահի խորհրդականի խոսքով՝ երկու հայկական վարժարանները մեծ ոգևորությամբ ցանկություն են հայտնել մասնակցելու «Քույր դպրոց» ծրագրին, որի միջոցով կկարողանան համագործակցել Արցախի Հանրապետության դպրոցների հետ:
