ՀՀ ազգային ժողովի «Քաղաքացիական պայմանագիր» խմբակցության պատգամավոր Վլադիմիր Վարդանյանը կարծում է, որ Արցախում ադրբեջանական միջամտությամբ գազամատակարարման դադարեցման հարցը, Ադրբեջանի նման պահվածքը ավելի են ամրապնդում Հայաստանի դիրքերը ՄԱԿ-ի միջազգային դատարանում՝ կապված Ռասսայական խտրականության բոլոր ձևերի վերացման մասին կոնվենցիայի լուրջ խախտումների հետ: Վարդանյանը նման տեսակետ հայտնեց խորհրդարանական ճեպազրույցում:
Նա հիշեցրեց, որ հարցին կառավարության նիստում անդրադարձել է նաև ՀՀ վարչապետը: Ադրբեջանի նման «արկածախնդրությունն» ուղղված է Արցախում էթնիկ զտումների քաղաքականությունն ավարտին հասցնելուն:
«Մենք սրա մասին խոսել էինք ինչպես պատերազմից առաջ, այնպես էլ ընթացքում և հետո, որ Արցախում մենք տարածքային խնդիրներ չենք լուծում, Արցախում խոսքը գնում է ժողովուրդների իրավունքների մասին: Եվ այն վարվելակերպը և գործիքակազմը, որն այսօր օգտագործում է Ադրբեջանը, ըստ էության, ավելի է ամրապնդում մեր դիրքերը, մասնավորապես, ՄԱԿ-ի միջազգային դատարանում՝ կապված Ռասսայական խտրականության բոլոր ձևերի վերացման մասին կոնվենցիայի լուրջ խախտումների հետ: Այս ամենն, ըստ էության, առավել հիմնավոր, տեսանելի է դարձնում, որ Արցախում խնդիրը կրում է էքզիստենցիալ բնույթ»,-ասաց պատգամավորը:
Արցախի Հանրապետությունում գազամատակարարումը դադարեցվել էր մարտի 7-ի լույս 8-ի գիշերը՝ ադրբեջանական կողմի վերահսկողության տակ գտնվող տարածքում գազատար խողովակի պայթելու պատճառով: Ադրբեջանական կողմը թույլ չէր տալիս հայկական կողմին, ՌԴ խաղաղապահներին մոտենալ Արցախ մտնող միակ գազատար խողովակին և վերականգնել գազամատակարարումը: Այնուհետև ՀՀ կառավարության և ռուս խաղաղապահների աջակցությամբ իրականացվող բանակցությունների շնորհիվ ադրբեջանական կողմը կատարել էր վնասված գազատար խողովակի վերանորոգման աշխատանքներ: Մարտի 21-ից Ադրբեջանի միջամտությամբ Արցախում կրկին դադարեցվել էր գազի մատակարարումը: Արցախից հայտարարել էին՝ ունեն բավարար հիմքեր պնդելու, որ մարտի 8-ին պայթեցված գազատարի վերանորոգման աշխատանքների ընթացքում ադրբեջանական կողմը տեղադրել է փական, որի միջոցով էլ դադարեցրել է գազամատակարարումը։
