Գլխավոր մարզիչն է առհասարակ որոշում, թե ինչ ֆուտբոլիստի կանչել կամ չկանչել, և հայտարարության մեջ մենք նաև նշել ենք, որ բոլոր ֆուտբոլիստներին, որոնց չենք հրավիրել, նրանք մեզ համար կարևոր են և կարևոր դեր ունեն: Այս մասին ասաց ՀՖՖ մամուլի բաժնի պատասխանատու Հայկ Կարապետյանը` անդրադառնալով Մխիթարյանին Հայաստանի ազգային հավաքական չհրավիրելուն:
«Հենրիխ Մխիթարյանին չհրավիրելու որոշումը եղել է միմիայն գլխավոր մարզչի կողմից, գլխավոր մարզիչը այս խաղին նպատակահարմար է գտել մի շարք ֆուտբոլիստների չհրավիրել և հրավիրել այն ֆուտբոլիստների, որոնց ցուցակը հրապարակվել է»,- ասաց Հայկ Կարապետյանը:
Հայաստանի հավաքականի նախկին կիսապաշտպան, Եվրոպայում ՀՖՖ դեսպան Լևոն Պաչաջյանը ֆեյսբուքյան իր էջում գրել է, որ երեկ զրուցել է Հայաստանի հավաքականի ավագ Հենրիխ Մխիթարյանի հետ հավաքական չհրավիրվելու թեմայով․
«Երեկ եմ խոսել Հենոյի հետ: Տղեն ամենաբարձր պրոֆեսիոնալի նման է մոտենում նման հարցերին: Միակ բանը, որը ուզում էի հասկանալ մեր զրույցից, հիասթափություն կա՞ իր մոտ, թե՞ ոչ: Չկա ու չի կարող լինել: Միայն պարզաբանելու և բացատրելու պահ կա, որը մարզիչ-խաղացող տիրույթում է: Նորմալ պրոցես է սա ֆուտբոլում, ինչքան էլ երկրպագուների համար զարմանալի ու անսպասելի լինեն նման հարցերը: Եվս մեկ անգամ հավելեմ, որ մեծ հույսեր ունեմ՝ ապագայում հավաքականի ավագը իր տեղում կլինի»,- գրել է Պաչաջյանը։
Երեկ ևս Պաչաջյանը անդրադարձել էր այս թեմային․ «Հենոյի պարզաբանումն ինձ համար առավել քան հստակ է և հավաստի։ Խնդիրը մարզչական ինչ-ինչ հաշվարկների մեջ է, և ես հակված եմ մտածել, որ Ազգային հավաքականի ավագը պարտադիր պետք է լինի մեր թիմում: Մարզիչը կարող է հազար ու մի պատճառ բերել նրան չհրավիրելու համար, բայց դրանք այս պահին ոչ մի կերպ, ըստ իս, արդարացված չեն: Հուսով եմ՝ գալիք պաշտոնական խաղերին Մխիթարյանը կառաջնորդի մեր Հավաքականին դեպի նորանոր հաղթանակներ։
ՀՖՖ-ում շատ ընկերներ ունեմ, ովքեր տարակուսած են մարզչի որոշումներից: Բայց դա՝ չի նշանակում, որ նրանք իրենց իրավունք պետք է վերապահեն խառնվեն մարզչի գործերին, ինչը և որպես պրոֆեսիոնալներն անում են: Բոլոր հարցերի պատասխանները մարզչի տիրույթում են: Դավադրություններ, քաղաքական շահարկումներ, անձնական վրեժ և այլն թարգեք այս որոշման մեջ ման գալ: Կա մարզիչ, կա իր տեսակետը և վերջ»,- գրել էր Պաչաջյանը: