Ռուսաստանի Դաշնության արտաքին գործերի փոխնախարար Միխայիլ Գալուզինը Թուրքիայի փոխարտգործնախարար Բուրաք Աքչափարի հետ քննարկել է իրավիճակը Անդրկովկասում և Ուկրաինայում։ Այս մասին չորեքշաբթի՝ մարտի 13-ին, հաղորդվում է ՌԴ ԱԳՆ կայքում։
Ըստ Դիվանագիտական գերատեսչության՝ կողմերը համեմատել են տեսակետները Անդրկովկասում իրերի վիճակի վերաբերյալ՝ ընդգծելով հայ-ադրբեջանական հարաբերությունների կարգավորման գործընթացի կարևորությունը և «դրա խթանումը առաջին հերթին տարածաշրջանային ձևաչափերում»։
Քննարկվել է ուկրաինական ճգնաժամի թեման, այդ թվում՝ դրա քաղաքական և դիվանագիտական կարգավորման հեռանկարները։ Բացի այդ, տրվել է Կենտրոնական Ասիայի երկրների հետ փոխգործակցության գնահատական։ Ռուսական պատվիրակությունը նշել է տարածաշրջանի պետությունների հետ գործընկերության բարձր դինամիկան։
Շոշափվել են նաև ռուս-թուրքական օրակարգի որոշ ասպեկտներ՝ «Մոսկվայի և Անկարայի միջև համագործակցության խորացման և կառուցողական երկխոսության հետագա համատեղ քայլերի տեսանկյունից»։
