Մենք գտնում ենք, որ դեպի Եվրոպա գնացող Հայաստանի վրա հարձակվելը անհամեմատ ավելի ծանր ու բարդ է լինելու Ադրբեջանի ու Ռուսաստանի համար: Այս մասին այսօր մամուլի ասուլիսին ասաց «Հանրապետություն» կուսակցության առաջնորդ Արամ Սարգսյանը: Նա նկատեց, որ անվտանգային խնդիրները վերջին օրերին տարածաշրջանում առավելևս սրվել էին։
«Իհարկե համար մեկ երաշխավորը մեր բանակն է, և մենք պետք է,մեր բանակի դերը, բանակ-պետություն հասկացությունը գերկարևորնեք»,-ասաց նա: Արամ Սարգսյանը նշեց, որ Եվրոպան ճանաչում է Հայաստանի սահմանները, իսկ մեր ռազմավարական գործընկերը չի ճանաչել:
2020 թվականից Ռուսաստանը, Թուրքիան և Ադրբեջանը ՀՀ իշխանություններից, մասնավորապես Փաշինյանից, պահանջում են Մեղրիի միջանցք։ Եթե Փաշինյանը տվող լիներ, մինչև հիմա տված կլիներ, տվողները ովքեր են՝ դա ակնհայտ երևում է: Այս մասին այսօր մամուլի ասուլիսին ասաց «Հանրապետություն» կուսակցության առաջնորդ Արամ Սարգսյանը:
«Նախկին երեք նախագահներն իրենց տեսակետն ասել են այդ միջանցքը տալու-չտալու, այդ միջանցքով խնդիրներ լուծելու առումով։ Փաշինյանն ասել է՝ ոչ, դա ինձ համար կարմիր գիծ է, դրա համար ես այդտեղ հետդարձի ճանապարհ չեմ տեսնում:
Անցած տարի մենք թուղթ ենք ստորագրել, որտեղ ասել ենք, եթե ինքը գնում է այս ճանապարհով մենք իրեն օգնում ենք, եթե հետքայլ է անում, մենք դառնում ենք իր ամենաուժեղ քննադատը, փողոց էլ դուրս կգանք, դրոշներ էլ կհանենք, ճանապարհ փակելն էլ ինքը սովորոցրել է, կփորձենք դա էլ անենք, թեև ես միշտ դեմ եմ եղել դրան»,- ասաց նա:
Արամ Սարգսյանը նշեց, որ Հայաստանի ամենամեծ առավելությունը տարածաշրջանի մյուս երկրների համեմատ այն է, որ Հայաստանը ժողովրդավար երկիր է:
Ռուսաստանի գործընկերները, որոնք կարծում էին, որ այս օրակարգը միայն իշխանական օրակարգ է, մենք ցույց ենք տալիս, որ այս օրակարգը ունի լայն քաղաքական, հասարակական աջակցություն: Այս մամուլի ասուլիսին ասաց «Հանուն Հանրապետության» կուսակցության ղեկավար Արման Բաբաջանյանը՝ անդրադառնալով Եվրոպայի հետ համագործակցության խորացման օրակարգի շուրջ համախմբմանը:
«Եթե այդ օրակարգով հանդես է եկել իշխանությունը, մենք ցույց ենք տալիս մեր անվերապահ զորակցությունը այդ համակարգին և իշխանության գործընկերներին»,- ասաց նա:
Նա նշեց, որ այդ օրակարգը ուղերձ է նաև ներքին գործընկերներին, որոնք պայքարելու են դրա համար:
«Այս օրակարգը ուղերձ է նաև արևմտյան գործընկերներին, որոնք կարծում էին, որ այստեղ միայն իշխանության վրա է մնում պատասխանատվության բեռը. ոչ, մենք պատրաստ ենք իշխանության հետ պատասխանատվություն կրել այն հետևանքների համար, որոնք կարող է կրել մեր հանրությունը տարբեր ուղղություններով՝ ներքին, արտաքին սպառնալիքների տեսքով»,- ասաց նա և վստահություն հայտնեց, որ իրենց շրջանակն ընդլայնվելու է: