Ազգային ժողովը Ադրբեջանի կողմից Լաչինի միջանցքի փակելու հետ կապված արտահերթ նիստ կանցկացնի: Խորհրդարանական լսումների ժամանակ այս մասին հայտնեց ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանը:
«Ինչպես գիտեք, Ադրբեջանը փակել է Լաչինի ճանապարհը և դրա հետ կապված այսօր Ազգային ժողովում արտահերթ նիստ ենք անցկացնելու »,- ասաց Թունյանը:
ՀՀ ԱԺ «Հայաստան» խմբակցության պատգամավոր Իշխան Սաղաթելյանն ավելի վաղ հայտնել էր, որ նախաձեռնելու են ԱԺ արտահերթ նիստ, որի օրակարգում կլինի Ադրբեջանի ցեղասպան գործողությունները դատապարտող հայտարարության ընդունումը:
Ազգային ժողովի «Հայաստան» և «Պատիվ ունեմ» խմբակցությունների նախաձեռնությամբ Ազգային ժողովը դեկտեմբերի 14-ին՝ ժամը 14:00-ին արտահերթ նիստ կգումարի: Լրագրողների հետ ճեպազրույցում «Հայաստան» խմբակցության քարտուղար Արծվիկ Մինասյանը ասաց, որ իրենց ներկայացրած նախագիծը վերաբերվում է Ադրբեջանի կողմից Լաչինի միջանցքը պարբերաբար փակելուն, սադրիչ գործողություններին, Արցախը շրջափակելուն, արցախահայությանը հայրենազրկելուն միտված ադրբեջանական վարքագիծը դատապարտելուն, ինչպես նաև միջազգային հանրությանը կոչ ուղղելուն ու նաև Ռուսաստանի Դաշնության խաղաղապահներին զորակցություն հայտնելուն և նրանցից ավելի կոշտ արձագանք ակնկալելուն:
«Ազգային ժողովի արձագանքը շատ կարևոր է՝ հաշվի առնելով այն հանգամանքը, որ Արցախի Հանրապետության Ազգային ժողովը կոչով դիմել է նաև Հայաստանին: Այս պահին հստակություն չկա, թե «Քաղաքացիական պայմանագիր» խմբակցությունը ինչպիսի դիրքորոշում ունի: Երեկ մեր փոխանցած նախագիծը իրենց կողմից դիտարկվել է և ներկայացվել է առաջարկություն, մասնավորապես այն դրույթի վերաբերյալ, որ մեր հայտարարության նախագծում հստակ ամրագրվում է, որ Ադրբեջանի այս ցեղասպան քաղաքականությունը ևս մեկ անգամ ապացուցում է, որ Արցախը չի կարող լինել Ադրբեջանի կազմում և որ արցախահայության կյանքի և իրավունքի երաշխիքը Արցախի ժողովրդի ինքնորոշման իրավունքի իրացումն է: Նրանք առարկություն ունեն այս պարբերության վերաբերյալ»,- ասաց Մինասյանը:
